ЕИ Россияга қарши 21-санкциялар пакетини таклиф қилди

Янги чекловлар молия сектори, криптоактивлар, энергетика ва Россиянинг санкцияларни четлаб ўтиш схемаларига қарши қаратилган.

Таклифга кўра, қарийб 90 та Россия банки санкциялар рўйхатига киритилиши режалаштирилган. Агар пакет тасдиқланса, бу бир вақтнинг ўзида энг кўп банкка нисбатан жорий этиладиган чекловлар бўлади. 

Шунингдек, 11 та криптоплатформа, Россиянинг «соя флоти»га алоқадор кемалар, нефть савдоси билан шуғулланувчи компаниялар ҳамда ҳарбий саноат учун муҳим аҳамиятга эга айрим маҳсулотларга нисбатан янги чекловлар таклиф қилинган.

ЕИ ташқи ишлар ва хавфсизлик сиёсати бўйича олий вакили Кая Калласнинг айтишича, янги пакет Россиянинг молиявий тизимига босимни кучайтириш ва санкцияларни четлаб ўтиш имкониятларини чеклашга қаратилган.

Шу билан бирга, Европа комиссияси Россиянинг Украинага қарши урушини қўллаб-қувватлаётган деб ҳисобланган яна 170 нафар жисмоний ва юридик шахсни санкциялар рўйхатига киритишни таклиф этмоқда.

Кая Каллас, шунингдек, Ғарб санкциялари Россия иқтисодиётига 1,2–1,5 триллион доллар миқдорида зарар етказганини билдирди. Бироқ ушбу рақам мустақил халқаро иқтисодий институтлар томонидан тасдиқланган ягона расмий ҳисоб-китоб эмас, балки ЕИ расмийсининг сиёсий баҳоси ҳисобланади.

Таклиф этилган 21-санкциялар пакети кучга кириши учун Европа Иттифоқининг барча аъзо давлатлари томонидан бир овоздан маъқулланиши лозим.