Нукусда боғча тарбияланувчиси шиппак билан калтакланди

Аниқланишича, видеолавҳада акс этган ҳолат 2024 йил ноябрь ойида Нукус шаҳрида жойлашган хусусий мактабгача таълим ташкилоти тарбиячиси Р.Ш. ва унга ёрдамчи тарбиячи Д.С.лар томонидан содир этилган.

"Мазкур ҳолат юзасидан Нукус шаҳар прокуратураси томонидан терговга қадар текширув ҳаракатлари олиб борилмоқда. Натижасига кўра, қонуний қарор қабул қилиниши Қорақалпоғистон Республикаси прокуратураси томонидан назоратга олинган", дейилади муносабатда.

Ўзбекистондаги боғчаларда болаларнинг калтакланиши билан боғлиқ аниқ статистик маълумотлар мавжуд эмас. Бироқ, вақти-вақти билан ижтимоий тармоқларда ва оммавий ахборот воситаларида тарбиячиларнинг болаларга нисбатан зўравонлиги акс этган видеолар пайдо бўлади. 

Бундай ҳолатлар болаларнинг жисмоний ва руҳий саломатлигига салбий таъсир кўрсатади. Калтакланиш болаларда қўрқув, ишончсизлик, ўз-ўзини паст баҳолаш каби муаммоларни келтириб чиқариши, уларнинг келажакдаги ривожланишига салбий таъсир қилиши мумкин. 

Маълумот учун, Мактабгача таълим ташкилотларида болаларнинг ҳаёти ва соғлиғини муҳофаза қилиш бўйича махсус тартиблар мавжуд бўлиб, улар болаларнинг хавфсизлигини таъминлашга қаратилган. Агар бундай зўравонлик ҳолатлари аниқланса, масъул шахслар тегишли тартибда жавобгарликка тортилиши лозим.