Тошкентдаги меҳмонхонадан уч кишининг, жумладан икки нафар Россия фуқаросининг жасади топилди

Вафот этганлардан бири "Лента" нашри ҳамда "Профиле" журналида ишлаган 47 ёшли журналист Инесса Паперная бўлиб, у Ўзбекистонга таътилни ўтказиш учун 44 ёшли Максим Радченко билан бирга келган. Максим Радченконинг ҳам воқеа жойидан жасади топилган. 

Бундан ташқари, бошқа хонанинг ваннахонасидан Ўзбекистон фуқароси бўлган 48 ёшли Хушнуд Удековнинг мурдаси чиққан. 

Бош прокуратура томонидан тақдим этилган дастлабки суд-тиббий хулосасига кўра, ҳалок бўлганларнинг ўлимига номаълум этиологияли модда билан заҳарланиш сабаб бўлган. 

Мазкур ҳолат юзасидан Жиноят кодексининг 186-моддаси 4-қисми "а" банди (хавфсизлик талабларига жавоб бермайдиган товарларни ўтказиш мақсадида ишлаб чиқариш, сақлаш, ташиш ёхуд ўтказиш, ишларни бажариш ёки хизматлар кўрсатиш) билан жиноят иши қўзғатилган. Ҳозирда тергов олиб борилмоқда.