ЕИ мигрантларни Ўзбекистонга юбориш масаласини кўриб чиқмоқда

Бу ҳақда POLITICO нашри европалик дипломатларга таяниб хабар берди.

Маълум қилинишича, Европа Иттифоқи биринчи марта мигрантларни қайтариш тизимининг бир қисмини ўз ҳудудидан ташқарига чиқаришни режалаштирмоқда.

Янги қонунчиликка мувофиқ, ЕИ давлатлари инсон ҳуқуқлари ва халқаро ҳуқуқ талабларига риоя қилувчи учинчи мамлакатларда мигрантларни қабул қилиш марказларини ташкил этиши мумкин.

Дипломатик манбаларга кўра, Дания, Австрия, Греция, Германия ва Нидерландия ушбу ташаббусни илгари сурмоқда. Улар 2026 йил давомида дастлабки келишувларга эришиш ва марказларни 2027 йилдан ишга туширишни мақсад қилган.

Ҳозирча қайси давлатлар расман мезбон бўлиши аниқ эмас. Руанда ва Ўзбекистон номлари муҳокамаларда тилга олинган бўлса-да, ҳеч қандай расмий келишув имзоланмаган.

Нашр маълумотига кўра, Европа Иттифоқи сўнгги йилларда Руанда ва Ўзбекистонга йирик молиявий дастурлар орқали маблағ ажратган. Шу билан бирга, Уганда ҳам эҳтимолий номзодлар қаторида кўриб чиқилмоқда.

Мазкур ташаббус Европа давлатларида баҳсларга сабаб бўлмоқда. БМТ Қочқинлар бўйича олий комиссарлиги ва инсон ҳуқуқлари ташкилотлари мигрантларни учинчи давлатларга юбориш амалиёти инсон ҳуқуқлари нуқтаи назаридан хавф туғдириши мумкинлигини билдирмоқда.

Франция ва Испания каби айрим давлатлар ҳам ушбу механизм самарадорлигига шубҳа билан қарамоқда.

Айни пайтда Европа Иттифоқи томонидан Ўзбекистон ҳудудида қайтариш марказлари ташкил этилиши бўйича расмий қарор қабул қилинмаган.