Тошкент ва Зангиотада 55 минг истеъмолчи электрсиз қолди

Бу ҳақда Ўзбекистон Энергетика вазирлиги маълум қилди.

Вазирликка кўра, авария 28 июнь куни соат 20:45 да Яккасарой туманида жойлашган «Юксак» подстанциясида содир бўлган. Дастлабки маълумотларга кўра, ҳодисага 110 кВли электр тармоғидаги техник носозлик сабаб бўлган.

Авария оқибатида Тошкент иссиқлик электр марказида умумий қуввати 60 МВт бўлган иккита газ-турбина қурилмаси автоматик равишда ишдан тўхтаган.

Электр энергияси узилиши Яккасарой, Чилонзор, Миробод ва Учтепа туманлари, шунингдек, Тошкент вилоятининг Зангиота туманидаги 55 минг истеъмолчига таъсир қилди. Айрим кичик саноат корхоналари фаолияти ҳам вақтинча тўхтаб қолган.

Энергетика вазирлиги маълумотига кўра, авариядан кейин электр таъминоти босқичма-босқич тикланган.

• Соат 21:50 да Яккасарой, Чилонзор ва Учтепа туманларидаги истеъмолчиларга 90 МВт қувватда электр узатилиши қайта йўлга қўйилди.
• 29 июнь соат 00:08 да Миробод туманидаги истеъмолчиларнинг электр таъминоти тикланди.
• 00:09 да Яккасарой ва Чилонзор туманларида яна бир гуруҳ истеъмолчилар тармоққа уланди.
• 00:25 да Чилонзор тумани ҳамда Зангиота туманидаги электр таъминоти қайта тикланди.

Вазирликнинг маълум қилишича, барча авария-таъмирлаш ишлари якунланган ва 29 июнь соат 03:56 ҳолатига кўра электр таъминоти тўлиқ тикланган.