Тошкентда «Европа плюс Ўзбекистон» радиостанцияси иш бошлади

Тошкентда янги бренд остида радио эфирга чиқди

Мазкур частотада аввал Oriat FM эшиттиришлар олиб борган. Радио жамоаси маълум қилишича, техник жиҳатдан ҳеч қандай ўзгариш бўлмаган — жамоа ва эфир сақланиб қолган, ўзгариш фақат бренд номида амалга оширилган.

«Европа плюс» қандай радио?

«Европа плюс» 1990 йил 30 апрелда Москва шаҳрида ташкил этилган бўлиб, собиқ иттифоқ ҳудудидаги илк нодавлат тижорат радиостанцияларидан бири ҳисобланади.

Бугунги кунда радиостанция Россия, Қозоғистон, Қирғизистон, Тожикистон, Арманистон ва Молдовада фаолият юритади. Энди ушбу тармоққа Ўзбекистон ҳам қўшилди.

Эфирда қандай контент бўлади?

«Европа плюс» CHR (Contemporary Hit Radio) форматида ишлайди. Бу формат асосан:

• энг янги жаҳон хитлари;
• маҳаллий оммабоп қўшиқлар;
• ёшлар аудиторияси учун мусиқий дастурлар;
• тезкор янгиликлар эфирини ўз ичига олади.

Радиостанция 1993 йилдан буён ўз ахборот таҳририятига ҳам эга бўлиб, мусиқа билан бир қаторда кунлик янгиликларни ҳам тақдим этиб келади.

Замонавий технологияларга таянади

Сўнгги йилларда «Европа плюс» рақамли технологияларга катта эътибор қаратмоқда. Радио замонавий студиялар, видеоэфирлар ва рақамли эшиттириш форматларидан фойдаланади.

Шунингдек, бренд ҳар йили ўтказиладиган Europe Plus LIVE мусиқа фестивали ҳамда инновацион лойиҳалари билан ҳам танилган.

Тошкентдаги эфирнинг йўлга қўйилиши Ўзбекистон радиобозорида халқаро брендлар иштирокини кенгайтириш ва замонавий мусиқий контент турларини оммалаштириш йўлидаги муҳим қадамлардан биридир.