Тошкентда юз берган "авария"да ҳайдовчи ҳалок бўлди

Қайд этилишича, ҳодиса кеча, 10 октябрь куни соат 23:30 ларда пойтахтнинг Олмазор тумани Нурафшон кўчасида юз берган. 

Унда 1984 йилда туғилган Б.Қ. бошқарувида бўлган "Spark" русумли автомашина ҳамда ҳайдовчи 2004 йилда туғилган И.Т. бошқарувида бўлган "Matiz" автомобили иштирокида йўл-транспорт ҳодисаси содир бўлган. 

ЙТҲ сабаб "Spark" автомашинаси ҳайдовчиси олган тан жароҳатлари оқибатида воқеа жойида вафот этган. Шунингдек, мазкур  автомашина ичида бўлган 2 нафар йўловчиларга ҳамда "Matiz" ҳайдовчисига биринчи ёрдам кўрсатиш мақсадида шифохонага олиб кетилган. 

Мазкур ҳолат юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилган бўлиб, тергов давом этмоқда. 

Эслатиб ўтамиз, Самарқанд вилоятида юқори тезликда ҳаракатланган "Range Rover" машинаси у билан бир йўналишда ҳаракатланган ҳамда йўл четида тўхтаб турган автомобилларга бориб урилиши оқибатида ЙТҲ юз бергани ҳақида хабар берган эдик. Мазкур ҳодисада ҳам бир нафар фуқаро ҳалок бўлган эди.