Аввал ЎзЖОКУ, энди эса Миллий: Университет раҳбариятига салом бермаган талаба жазоланди

"2024 йилнинг 7 октябрь куни хаёл билан маънавий- маърифий ишлар бўйича декан ўринбосари У.Э.Қурбоновга ва бошқа устозларга салом бермаганим учун узр сўрайман. Бу ҳолат бошқа такрорланмайди", дея ёзган талаба.

Мазкур хабар тармоқларда бир кун айланганидан сўнг, ҳолат бўйича Миллий университети расмий муносабат билдириб чиқди. Унга кўра, талабадан салом бермагани учун тушунтириш хати олинмаган.

"Ижтимоий тармоқларда тарқалган хабар ва постларга жавобан шуни маълум қиламизки, Ўзбекистон Миллий университетида ёшлар билан ишлаш бўйича декан ўринбосари ва бошқа устозларга салом бермагани учун ҳеч қандай масъул томонидан талабадан тушунтириш хати ёздириб олинмаган", дейилади изоҳда.

Шунингдек, хабарда Миллий университети талабаларнинг устозларга ҳурмат билан муносабатда бўлиши, салом бериши ёки бермаслиги уларнинг шахсий маданиятига тааллуқли масала эканига тўхтаб ўтилган. Бироқ муносабатда талабанинг узр сўраб, тушунтириш хати ёзишга мажбурлангани юзасидан изоҳ берилмаган. 

Мазкур ҳолатни ижтимоий тармоқ фойдаланувчилари турлича талқин қилмоқда. Айримлар талаба салом бермаса, маданиятсиз бўлиб қолмаслигини, салом бермаганлик учун жазолаш аҳмоқликдан бошқа нарса эмаслигини айтаётган бўлса, бошқа бир тармоқ фойдаланувчиси университет раҳбарияти тинч кетаётган болани тўхтатиб, бекорга танбеҳ бермаса керак деган изоҳларни қолдирган.

Ушбу ҳолат аввалроқ ЎзЖОКУ (Ўзбекистон журналистика ва оммавий коммуникациялар университети)да ҳам кузатилган. Унда талаба университет ректорига салом бермагани учун ходим томонидан калтаклангани айтилган эди. Шунда ҳам юқоридаги каби университет ректори Шерзодхон Қудратхўжа бу воқеадан хабари йўқлигини, ноҳақ ҳаракат қилганлар жазоланганини, талабанинг салом бериш-бермаслиги ихтиёрий эканлигини айтган эди.