Фурқат тумани ИИБ раҳбарлари мактаб директорига нисбатан зўравонлик қўллагани учун судланди

Суд қарорига кўра, Фурқат тумани ИИБнинг икки раҳбари — Акмал Хўжаев ва Жасур Расулов тўрт йил озодликдан маҳрум этилган. Улар жазони тузатиш колонияларида ўтамоқда ва уч йил давомида ички ишлар тизимида ишлаш ҳуқуқидан маҳрум қилинган.

Ҳодиса мактаб директори солиқ бўлими бошлиғига қарши кўрсатма бериши учун босим ўтказилганидан кейин содир бўлган.

Гулирано Қосимованинг сўзларига кўра, 17 апрель куни у йўл-транспорт ҳодисасида жароҳат олган эрининг шошилинч операцияси учун ёрдам сўраб туман солиқ инспекцияси бошлиғи Қурбонали Абдурахмоновга мурожаат қилган. Аёл уни шахсан танишини ва молиявий кўмак олишга умид қилганини айтди.

Қосимованинг таъкидлашича, учрашув пайтида кабинетга тўсатдан фуқаролик кийимидаги бир нечта ИИБ ходимлари кириб келган. Унга кўра, улар уни ва эркакни таҳқирлаган, ҳатто мажбуран ечишган. Аёлнинг айтишича, ходимлар уни шантаж қилиш учун камерани ёқиб, гуё уларни интим алоқа пайтида ушлагандек қилиб видеога олишни бошлаган.

«Улар эримга видеони кўрсатиш ва мени бошқа эркак билан ушлаганмиз деб айтиш билан таҳдид қилишди. У ерда бўлган манзарани тасвирлаб ҳам беролмайман. Одамларни ҳимоя қилиши керак бўлган орган ходимлари бунчалик пасткашликка тушиши ҳеч хаёлимга келмаганди», — деди Гулирано Қосимова.

Суд жараёни октябрда бошланган, аммо мажлисларнинг аксари ёпиқ ўтди. ОАВ вакиллари судга киритилмаган. Қосимованинг айтишича, у судда ўзини жабрланувчи эмас, айбланувчидек ҳис қилган.