Рақамли ултиматум: Эрон Форс кўрфазидаги интернет инфратузилмасини бузиш билан таҳдид қилмоқда

Нега бу бутун дунё учун муҳим?

Жаҳон трафигининг муҳим қисми хавф остида
Қизил денгиз ва Ҳурмуз бўғози орқали Осиё ва Европани боғловчи асосий магистраллар — AAE-1 (Asia-Africa-Europe 1) ва EIG (Europe India Gateway) каби линиялар ўтади. Улар орқали глобал интернет трафигининг катта қисми таъминланади.

Дата-марказлар фаолиятига таҳдид
БАА ва Саудия Арабистонида жойлашган замонавий маълумотлар марказлари хавф остида. Бу эса Microsoft, Google ва Amazon каби компанияларнинг булутли ҳисоблаш ва сунъий интеллект соҳасидаги глобал лойиҳаларига салбий таъсир кўрсатиши мумкин.

Молия ва крипто бозорига зарба
Алоқанинг узилиши сигнал кечикишини (latency) оширади. Бу эса тезкор банк операциялари ва криптобиржалардаги савдоларга жиддий тўсқинлик қилиши мумкин.

Узоқ муддатли узилиш хавфи
Ҳарбий ҳаракатлар давом этаётган ҳудудда таъмирлаш ишларини олиб бориш қийин. Сувости кабелларини тиклаш ярим йилгача вақт олиши мумкин, бу эса минтақанинг узоқ муддатли рақамли яккаланишига олиб келиши эҳтимоли бор.

Жорий вазият

Alcatel Submarine Networks (ASN) — йирик телеком пудратчи компания форс-мажор эълон қилиб, ишларини тўхтатган. Айрим маълумотлар Умон орқали ер усти линиялари билан йўналтирилиши мумкин, аммо уларнинг қуввати эҳтимолий йўқотишларни тўлиқ қоплашга етарли эмас.

Экспертлар интернет тезлигининг глобал пасайиши ва технологик сектор учун миллиардлаб доллар зарар келтиришини прогноз қилмоқда.

Муаллиф: Азиз СОЛИЕВ