Грузияда ўн минглаб одамлар намойишга чиқди: Ким, қачон, қаерда? (фоторепортаж)

Бу қарор Грузиянинг Европа Иттифоқига яқинлашиш орзусига қаттиқ тўсқинлик сифатида қабул қилинди ва кенг жамоатчиликнинг норозилигига сабаб бўлди. Ҳатто Президент Саломе Зурабишвили ҳам намойишчиларга қўшилиб, ҳукуматни танқид қилди ва қарорни бекор қилишни талаб қилди. 

Бир неча кундан буён давом этиб келаётган норозилик намойишида 100 мингга яқин аҳоли парламент биносининг олдида қўлларига байроқ кўтариб, Грузиянинг Европа Иттифоқига киришини талаб қилмоқда. Бунга жавобан полициячилар сув пуркагичлар, кўздан ёш оқизувчи газ ва резина ўқлардан фойдаланиб, қаршилик кўрсатмоқда.

 Тўрт кун ичида 224 нафар фуқаро қўлга олиниб, шундан 36 нафари жаримага тортилган, 34 нафар фуқарога маъмурий қамоқ чораси қўлланилган. Яна икки нафар шахсга эса жиноий иш қўзғатилган. 

Намойишга чиққанлар полицияни рус қуллари дея атаб, уларга қарата пиротехника воситалари ҳамда тош улоқтирмоқда. Бунинг оқибатида ҳозиргача 113 нафар полициячи жароҳатланди. 

Тбилисидан ташқари яна саккизта шаҳарда намойишлар кузатилмоқда. Намойишчилар Қора денгизда жойлашган мамлакатнинг асосий савдо портига кириш йўлини ҳам тўсиб қўйган. 

Бу ҳолат ортидан Грузиянинг Италия, Нидерландия ва Литвадаги элчилари, шунингдек, Ташқи ишлар вазири ўринбосари истеъфога чиқди. АҚШ Давлат департаменти Грузия билан стратегик муносабатларни тугатди. Европа Иттифоқи ҳам Грузияда авторитаризм кучлаётганини ва полиция намойишчиларга қарата агрессив муносабатда бўлаётганини танқид қилмоқда.

CNN талқинига кўра, "Грузия орзуси" партияси руспараст бўлиб, унга Россияда бойлик орттирган миллиардер томонидан асос солинган.

"2008 йилда Россия ва Грузия ўртасида беш кунлик урушдан кейин икки мамлакатнинг муносабатлари буткул узилган эди. Бироқ, сўнги йилларда Тиблиси ва Москва ўртасидаги муносабатлар илиқлашган. Бунга эса қисман "Грузия орзуси" партияси Россияга Европа давлатларига таъсир қилишда ёрдам бергани сабаб бўлган", дейилади CNN нашрида ёритилган мақолада.

Мамлакат Бош вазири Ираклий Кобахидзе "Грузия орзуси" партиясининг Россия билан алоқадорлиги ҳақидаги гапларни рад этди. Бунинг ортидан кеча, 2 декабрь куни Кремль матбуот котиби Димитрй Песков ҳам Россия Грузиядаги сиёсий жараёнларга аралашмаётгани ҳақидаги баёнот билан чиқди. 

Кобахидзенинг айтишича, партия Грузиянинг Европа Иттифоқига кириш масаласида содиқ қолади. Шунга қарамай, Ғарб партиянинг мақсадларига шубҳа билан қарамоқда. Унга кўра, аслида Европа Иттифоқи музокараларини кечиктиришни ноқонуний деб атаган юзлаб грузиялик дипломатлар ва давлат хизматчиларига шубҳа билан қараш керак. 

Бундан хулоса қилиш мумкинки, ушбу норозиликлар Грузиянинг Европага яқинлашиш истагининг қанча чуқур эканлигини билдиради. Шунингдек, ҳукуматнинг халқ талаблари билан ҳисоблашмаслиги қандай оқибатларга олиб келишини яққол кўрсатиб бермоқда. 

Шоҳжаҳон Мажидов