2000 га яқин санъаткорлар солиқ декларациясини тўлдирди

Маълум бўлишича, қўмита томонидан аввалроқ “Концерт-томоша фаолияти” хизмати бўйича “Солиқ” мобил иловасида солиқ декларациясини юбориш йўлга қўйилган. Ушбу хизмат хонанда ва ижрочиларга йиллик даромадлари бўйича декларацияни солиқ органларига тақдим этиш имконини беради.

“Бу орқали улар конституциявий бурчи бўлган – даромад солиғини тўлаш мажбуриятини бажармоқда”, — дейилади қўмита хабарида.

Мазкур тизим “Ўзбекконсерт” давлат муассасасининг маълумотлар базаси билан интеграциялашган ҳолда ишлайди.

Солиқ декларациясини тўлдирган энг кўп ҳудудлар бешталиги қуйидагича шаклланган:

Хоразм вилоятида – 294 нафар;

Тошкент шаҳрида – 291 нафар.

Бухоро вилоятида – 212 нафар;

Самарқанд вилоятида – 207 нафар;

Тошкент вилоятида – 157 нафар.

Лицензияга эга бўлган санъаткорлар иловада ўз шахсини ва Face ID'сини тасдиқлаганидан сўнг хизматдан автоматик равишда фойдаланиши мумкин. Қўмита маълумотларига кўра, 1954 нафар лицензия эгаси солиқ декларациясини топширган.