Қурилиш соҳасида 10 та йирик корхона 1,4 трлн сўм солиқ қарзига эга

Ушбу қарзнинг қарийб ярми атиги 10 та йирик ташкилот ҳисобига тўғри келмоқда.

Давлат солиқ хизмати маълумотларига кўра (2026 йил 1 февраль ҳолатига), солиқ қарзи 100 миллион сўмдан юқори бўлган қурилиш корхоналари сони 1 808 тани ташкил этади. Уларнинг умумий қарздорлиги 3 триллион 134,4 миллиард сўмга тенг.

Энг йирик 10 та қарздор корхона зиммасидаги қарз 1,4 триллион сўмни (46,8%) ташкил қилади.

Энг катта қарздор компаниялар:

• OLTIN TUPROQ MS — 432,3 млрд сўм
• KO‘PRIKQURILISH — 285,1 млрд сўм
• DONI BIG GROUP — 217,2 млрд сўм

Ҳудудлар кесимида энг юқори қарздорлик Тошкент шаҳри ва Тошкент вилоятига тўғри келмоқда:

• Тошкент шаҳри — 339 та корхона, 951,9 млрд сўм
• Тошкент вилояти — 198 та корхона, 643,6 млрд сўм
• Андижон вилояти — 112 та корхона, 279,4 млрд сўм

Шунингдек, Бухоро вилоятида қарздорлик 156,6 млрд сўмни, Навоий вилоятида эса 95,1 млрд сўмни ташкил этган.

Энг паст кўрсаткич Сирдарё (38,4 млрд сўм) ва Наманган (54,1 млрд сўм) вилоятларида қайд этилган.

Аввалроқ Рақобат қўмитаси айрим қурилиш компаниялари томонидан тузилаётган шартномаларда турли найрангбозлик кузатилгани ҳақида маълум қилган эди.