18 ёшдан кичик тожикистонликлар ишлаш учун хорижга чиқолмайди

Янги қонун 1999 йилдан бери амал қилиб келган ҳужжат ўрнини эгаллади. Аввалги қонунда меҳнат мигрантлари учун энг кам ёш алоҳида белгиланмаган эди.

Янги қонунга кўра, Тожикистон фуқаролари фақат мигрантларнинг ҳуқуқлари ва қонуний манфаатлари ҳимоя қилинадиган давлатларга меҳнат миграциясига бориши мумкин. Бундай ҳимоя халқаро битимлар ёки Тожикистон билан қабул қилувчи давлатлар ўртасидаги икки томонлама келишувлар асосида таъминланиши мумкин.

18 ёш талаби Тожикистонга ишлаш учун келадиган хорижий фуқароларга ҳам татбиқ этилади.

Хорижда иш топишнинг икки йўли

Қонунда Тожикистон фуқароларининг хорижда ишга жойлашиши учун икки асосий йўл назарда тутилган. Биринчиси – ишни мустақил равишда излаш, иккинчиси эса хорижда ишга жойлаштириш ҳуқуқига эга агентликлар ва бошқа ташкилотлар орқали уюшган ҳолда ишга ёлланиш.

Мустақил равишда иш излаётган фуқароларга миграция соҳасидаги ваколатли давлат органи бепул маълумот бериши керак. Бу маълумотлар бўш иш ўринлари, иш ҳақи миқдори, меҳнат шароитлари, иш берувчиларнинг талаблари ҳамда бориладиган давлатнинг қонунчилиги ва қоидаларини қамраб олади.

Вафот этган мигрантларнинг жасадини ватанга қайтаришга кўмаклашилади

Янги қонунда хорижда вафот этган Тожикистон фуқароларининг жасадини ватанга қайтаришга давлат органлари кўмаклашиши ҳам белгиланган.

Ҳужжатнинг 35-моддасига мувофиқ, бу вазифа ташқи сиёсат соҳасидаги ваколатли давлат органи, шунингдек, хориждаги дипломатик ваколатхоналар ва консуллик муассасалари зиммасига юклатилган. 1999 йилдаги қонунда бундай алоҳида норма мавжуд эмас эди.

Меҳнат миграцияси Тожикистон иқтисодиётида муҳим ўрин тутади. Жаҳон банки маълумотларига кўра, 2025 йилда мигрантлар юборган пул ўтказмалари мамлакат ялпи ички маҳсулотининг қарийб 46 фоизига тенг бўлган.