2025 йилнинг энг нуфузли аёллари кимлар? — Forbes

 Рўйхатдан сиёсат арбоблари, бизнес-вуменлар, олимлар ҳамда замонавий дунёнинг иқтисодий ва сиёсий кун тартибини белгилаётган маданий иконалар ўрин олган.

Баҳолаш аёлларнинг таъсир кучи, бойлиги, оммавий танилиши ва ўз соҳасидаги аҳамияти асосида амалга оширилган. Қуйида рўйхатнинг илк ўнталиги келтирилган. 

1. Урсула фон дер Ляйен — Европа Комиссияси президенти

2019 йил июлидан бери Урсула фон дер Ляйен Европа Комиссиясига раҳбарлик қилиб келмоқда. Ушбу ижро органи 450 миллиондан ортиқ европаликлар ҳаётига таъсир кўрсатувчи қонунчиликни ишлаб чиқади. Фон дер Ляйен мазкур лавозимни эгаллаган илк аёл ҳисобланади.

2005–2019 йилларда у Германия канцлери Ангела Меркел ҳукумат таркибида ишлаган, сўнгги олти йилда эса Германия мудофаа вазири бўлиб фаолият юритган. 2024 йилда иккинчи муддатга қайта сайланган фон дер Ляйен Европа демократик қадриятларини мустаҳкамлашни асосий устувор вазифа сифатида белгилади.

2. Кристин Лагард — Европа Марказий банки президенти

Кристин Лагард 2019 йил 1 ноябрдан бери Европа Марказий банкига раҳбарлик қилиб келади ва бу лавозимдаги илк аёлдир. У юқори инфляция шароитида еврозона иқтисодий барқарорлигини таъминлаш учун жавобгар ҳисобланади.

2011–2019 йилларда Лагард Халқаро валюта жамғармаси директори бўлган. У 2008 йилги молиявий инқирозни таҳлил қилар экан, қарор қабул қилишда “гуруҳ тафаккури”нинг салбий таъсирини танқид қилган ва гендер тенглигини қўллаб-қувватлаб келади.

3. Санаэ Такаити — Япония Бош вазири

2025 йил октябрида Санаэ Такаити Япония тарихидаги илк аёл бош вазир сифатида лавозимга киришди. У 1993 йилдан бери Либерал-демократик партияда турли юқори лавозимларда ишлаб келган.

Ҳозирда Такаити инфляция ва иш ҳақи ўсиши секинлашган шароитда дунёнинг тўртинчи йирик иқтисодиёти бўлган Японияни бошқариш масъулиятини ўз зиммасига олган.

4. Джорджия Мелони — Италия Бош вазири

Джорджия Мелони 2022 йил 22 октябрда Италия тарихида бош вазир лавозимини эгаллаган илк аёл бўлди. У шунингдек, 2012 йилда ташкил этилган ўнг қанотдаги “Италия биродарлари” партияси етакчиси ҳисобланади.

Мелони Европа миллатчилик ҳаракатларининг энг ёрқин вакилларидан бири бўлиб, ижтимоий консерватив сиёсат, миграцияни назорат қилиш ва иқтисодий протекционизмни илгари суради.

5. Клаудия Шейнбаум — Мексика президенти

2024 йил июнида Клаудия Шейнбаум Мексика тарихидаги илк аёл президент сифатида сайланди. Унинг октябрдаги инаугурация маросимида минглаб одамлар “Президентша!” деган шиорлар билан уни қарши олган.

Шейнбаум яҳудий оиласида туғилган бўлиб, Мексика тарихидаги биринчи яҳудий давлат раҳбари ҳамдир. 2018–2023 йилларда у Мехико мери сифатида шаҳарда инновацион Cablebús транспорт тизимини жорий этган. У энергетик инжиниринг соҳасида фан доктори ва 2007 йилда БМТ Иқлим панели таркибида Нобел тинчлик мукофотига сазовор бўлган жамоа аъзоси бўлган.

6. Жули Свит — Accenture компанияси бошқарув раиси ва бош директори

Жули Свит 2019 йилдан бери дунёнинг энг йирик консалтинг компанияларидан бири — Accenture’га раҳбарлик қилиб келмоқда.

У илгари компаниянинг бош юрисконсулти бўлган, шунингдек, Шимолий Америка бўлимига раҳбарлик қилган. Свит бизнесда тенглик ва хилма-хиллик муҳим аҳамиятга эга эканини доимий тарзда тарғиб қилади.

7. Мэри Барра — General Motors бош директори

Мэри Барра 2014 йилдан бери General Motors компаниясига раҳбарлик қилиб, АҚШдаги йирик автомобил ишлаб чиқарувчига бошчилик қилган илк аёлга айланди.

У электр автомобиллари ва автоном бошқарув технологияларига катта сармоя киритмоқда. 2025 йилда GM маҳаллий ишлаб чиқаришга катта инвестициялар йўналтиришини ва заводларни модернизация қилишни режалаштирганини эълон қилди.

8. Жейн Фрейзер — Citi банки бошқарув раиси ва бош директори

Жейн Фрейзер 2021 йилда Citi банкига раҳбар бўлиб, Уолл-стритдаги йирик банкни бошқарган илк аёл бўлди.

У илгари глобал истеъмол бизнеси ва корпоратив стратегия бўлимларига раҳбарлик қилган. 2025 йил октябрида Фрейзер банк директорлар кенгаши раиси этиб сайланди.

9. Абигейл Жонсон — Fidelity Investments бошқарув раиси ва бош директори

Абигейл Жонсон 2014 йилдан бери бошқарувида қарийб 6 триллион доллар активга эга бўлган Fidelity Investments компаниясини бошқариб келмоқда.

У оилавий бизнесни ривожлантириб, криптовалюта ва рақамли активлар соҳасида фаол ислоҳотлар олиб бормоқда. Жонсон 1988 йилдан бери компанияда ишлайди ва асосий акциядорлардан бири ҳисобланади.

10. Лиза Су — AMD (Advanced Micro Devices) бош директори

Лиза Су 2014 йилдан бери AMD компаниясига раҳбарлик қилиб, унинг даромадини 370 фоизга оширишга эришди ва компанияни яримўтказгичлар бозоридаги етакчилардан бирига айлантирди.

Тайванда туғилган Су болалигида АҚШга кўчиб ўтган ва MIT университетида докторлик даражасини олган. Ҳозирда у сунъий интеллект соҳасида Nvidia билан кучли рақобатга тайёргарлик кўрмоқда.