Путинни танқид қилган рассом ўлдирилди

Польшанинг Бяла-Подляска шаҳрида ўлдирилган 44 ёшли россиялик рассом ва фаол Семён Скрепецкий (Роберт Кузовков) иши бўйича икки нафар Беларусь фуқароси қўлга олинди.

Прокуратура маълумотига кўра, улар ҳозирча гумонланувчи сифатида ушлаб турилган бўлиб, уларга расмий айблов эълон қилинмаган. Терговчилар уларнинг жиноятга алоқадорлигини текширмоқда.

Бир неча ўқ узилган

Тергов маълумотларига кўра, ҳодиса турар жой яқинидаги автотураргоҳда содир бўлган. Номаълум шахс Семён Скрепецкийга яқин масофадан бир неча марта ўқ узган.

Польша ОАВларининг хабар беришича, ҳужум олдиндан режалаштирилган бўлиши мумкин. Ҳозирда айнан шу версия ҳам асосий йўналишлардан бири сифатида ўрганилмоқда.

Ўлимидан бир соат аввал таҳдидлар ҳақида ёзган

Маълумотларга кўра, Семён Скрепецкий фожиадан тахминан бир соат аввал ўзининг Telegram каналида таҳдидли хабарлар олаётганини маълум қилган.

Айрим маҳаллий нашрлар маълумотига кўра, гумонланувчилар Беларусь консуллиги яқинида ушланган. Шунингдек, воқеа жойига уларни Беларусь фуқароси бўлган такси ҳайдовчиси олиб келгани ҳақида ҳам хабарлар тарқалган. Бу маълумотлар тергов доирасида текширилмоқда.

Терговга махсус хизматлар ҳам жалб қилинган

Ҳозирда иш бўйича Польша полицияси ва прокуратураси билан бир қаторда мамлакат махсус хизматлари ҳам тергов ишларида иштирок этмоқда.

Ҳуқуқни муҳофаза қилувчи органлар қотилликнинг аниқ сабаблари, гумонланувчиларнинг роли ҳамда эҳтимолий буюртмачиларни аниқлаш устида иш олиб бормоқда.

Семён Скрепецкий Россия ҳукумати, Владимир Путин ва Рамзан Қодировни танқид қилувчи сатира асарлари ва акциялари билан танилган эди.