Путин НАТО билан қарама-қаршиликда ҳеч қачон ютмаслигини билади – Марк Рютте

Россия НАТОни агар Ғарб альянси Болтиқ бўйидаги эксклав – Калининградни қуршаб олишга уринса, ядровий арсенални ҳам ўз ичига олган жамики қурол-яроғларидан фойдаланишга шайлигидан огоҳлантирди. Бу ҳақда НАТОга аъзо давлатларга юборилган дипломатик ҳужжатда айтилган.

30 сентябрь куни юборилган дипломатик меморандумда таъкидланишича, Москва НАТО Калининградга ҳаво ва денгиз блокадаси тайёрлаётгани ҳақида маълумотга эга.

Бу даъвога НАТО Бош котиби Марк Рютте жавоб қайтарди. У НАТО мудофаа альянси эканини айтиб, Россияни ядровий таҳдидларни тўхтатишга чақирди ва ушбу ҳужжат вазиятни ижобий тарафга ўзгартирмаслигини таъкидлади.

Шунингдек, Рютте таҳдиднинг жиддийлигини паст баҳолади. Унинг айтишича, Владимир Путин НАТО билан тўғридан-тўғри қарама-қаршиликда «ҳеч қачон ғалаба қила олмаслигини билади».

Польша ва Литва билан чегарадош бўлган Калининград Россияга тегишли ҳудуд бўлиб, Болтиқ денгизи бўйида жойлашган. Минтақа Россиянинг муҳим ҳарбий таянч ҳудуди ҳисобланади. Бу ерда Россиянинг Болтиқ флоти ҳамда ядровий каллакларни олиб юришга қодир «Искандер» ракета тизимлари жойлаштирилган.

Россия Украинага қарши кенг кўламли уруш бошланганидан бери бу кескинлик қўшни давлатларга ҳам таъсир кўрсатмоқда.

Сўнгги ҳафталарда Россия самолётлари ҳаво ҳудудига кириб келгани ҳақидаги хабарлардан кейин Польша ҳаво мудофаасини кучайтирди. Дания расмийлари эса икки ҳафта аввал Россия ҳарбий кемаси Болтиқ денгизи устида Дания ҳарбий вертолёти яқинида иккита сигнал ракетасини отганини маълум қилди.