Қирғизистонда Россияга боғлиқ янги «Номад» телеканали очилади

Канал учун ходимларни асосан Россиянинг Sputnik агентлигида ишлаган муҳаррирлар тўпламоқда. Sputnik Қирғизистоннинг бош муҳаррири Эркин Алимбеков янги каналга ўтган, унинг рафиқаси Светлана Акматалиева эса ходимларни ўқитмоқда.

«Номад»га УТРК ва «7-канал»дан ҳам қатор журналистлар юқори ойлик сабаб ўтгани айтилмоқда. Молия манбалари очиқланмаган, аммо лойиҳага Россия маблағ йўналтираётгани ҳақида тахминлар бор.

Каналнинг продюсери — RTда ишлаган россиялик Анна Абакумова. У Россия оккупация қилган Украина ҳудудларида репортажлар тайёрлаган.

«Номад»да ишловчилар «Евразия» марказида ўқитилаётгани айтилмоқда. Бу марказ 2024 йилда Россияда ташкил этилган бўлиб, молиявий ва таълимий лойиҳалар билан шуғулланади. Уни Илан Шор молиялаштириши маълум.

Экспертлар фикрича, «Номад» Россиянинг Қирғизистондаги таъсирини кучайтиришга қаратилган. Мамлакатда аввалданёқ Россия каналлари — «Первый канал», «Россия 24», «Культура», «Звезда» ва Sputnik фаол тарзда ахборот тарқатиб келмоқда.

Сиёсатшунослар буни «марказий Осиёда Россия таъсирини сақлаб қолишга қаратилган ахборот уруши элементлари» деб баҳоламоқда.