Рамзан Қодировнинг тўнғич ўғли юқори лавозимга тайинланди

Бу ҳақда The Insider хабар берди. Чеченистон раҳбари Рамзан Қодиров ўғли Ахмат Қодиров Чеченистон Республикаси ҳукумати раиси ўринбосари вазифасини бажарувчи этиб тайинланганини маълум қилди.

Шунингдек, Чеченистон Республикасининг миллий сиёсат, ташқи алоқалар, матбуот ва ахборот вазири Ахмед Дудаев ҳам ҳукумат раиси ўринбосари вазифасини бажарувчи этиб тайинланди.

Рамзан Қодировнинг ижтимоий тармоқдаги баёнотида айтилишича, 2026 йил Чеченистон ҳукумати таркибидаги айрим кадрлар ўзгариши билан бошланган. Ҳукумат раиси Магомед Даудов тақдимига кўра, Ахмат Қодиров Чеченистон Республикаси ҳукумати раиси ўринбосари — жисмоний тарбия ва спорт вазири вазифасини бажарувчи этиб тайинланган. Шу билан бирга, Ахмед Дудаев ҳукумат раиси ўринбосари — миллий сиёсат, ташқи алоқалар, матбуот ва ахборот вазири лавозимига тасдиқланган.

Ахмат Қодиров 2005 йилда туғилган. У 2022 йилдан буён Чеченистон раҳбари маслаҳатчиси лавозимида фаолият юритиб келган, шунингдек, Россия болалар ва ёшлар ҳаракати — “Биринчи ҳаракат”нинг минтақавий бўлими кенгаши раиси бўлган.

2023 йил ноябрь ойида Ахмат Қодиров жисмоний тарбия, спорт ва ёшлар сиёсати бўйича вазирнинг биринчи ўринбосари этиб тайинланган. 2024 йил 17 февраль куни у Чеченистон Республикаси ёшлар ишлари бўйича вазири лавозимини эгаллаган. 21 май куни жисмоний тарбия ва спорт вазири этиб тайинланган, 23 май куни эса “Ахмат” футбол клуби президенти бўлган.

Шунингдек, Ахмат Қодиров Чеченистон Республикаси ёшлар сиёсати соҳасида хизмат кўрсатган ходим фахрий унвони соҳиби ҳисобланади.