"Соловьёвнинг қараши расмий позиция эмас" - Россия ТИВ муносабат билдирди

Россия Ташқи ишлар вазирлиги 2026 йил 15 январь куни бўлиб ўтган брифингда телебошловчи ва провокацион чиқишлари билан танилган Владимир Соловьёвнинг Марказий Осиё ва Кавказга оид шов-шувли баёнотлари ҳақидаги саволга жавоб берди.

Захарованинг таъкидлашича, Соловьёвнинг қарашлари — журналистнинг “шахсий фикри” бўлиб, Москва­нинг расмий позицияси эмас.

“Телебошловчи Владимир Соловьёвнинг Россия ташқи сиёсати ҳақидаги баёнотлари унинг шахсий фикридир ва амалда Россия Федерациясининг расмий позицияси ҳисобланмайди”, — деди Россия ТИВ матбуот котиби Мария Захарова.

Унинг сўзларига кўра, Соловьёв ўз фикрларини давлат телеканалида эмас, балки “Solovyov LIVE” номли шахсий каналида билдирган. Захарова журналист нутқини шахсан ўрганганини айтиб, у ерда қатъий чақириқ эмас, балки “риторик савол” шаклидаги мулоҳаза мавжудлигини таъкидлади.

“Бу журналистнинг фикри. Фикр шахсий каналда айтилган. Мен иқтибосларни ўқидим ва контекстдан юлиб олинган ибораларга таянмадим. Бунга жавоб бериш менинг ишим эмас”, — деди у.

Масъулиятни бошқаларга юклаш ва провокация ҳақидаги айбловлар

Захарованинг таъкидлашича, муаммо Соловьёвнинг сўзларида эмас, балки уларни контекстдан юлиб олиб, Россиянинг расмий позицияси сифатида тақдим этаётган “диван таҳлилчилари”дадир. У бундай талқинларни провокация деб атаб, улар собиқ СССР давлатларига нисбатан Россиянинг гўё “тажовузкор ниятлари” ҳақида асоссиз қўрқув уйғотишга қаратилганини билдирди.

Эслатиб ўтиш жоиз, Соловьёв ўз дастурида Украинадаги урушни мисол қилиб, Арманистон ва Марказий Осиёга қарши эҳтимолий ҳарбий ҳаракатлар ҳақида гапирган эди.

Расмий Москва позициясига кўра, давлатнинг расмий нуқтаи назарини фақат ваколатли мансабдор шахслар ифода этади. Шу сабабли, шахсий медиа платформаларда билдирилган ҳар қандай фикрлар давлат сиёсати сифатида қабул қилинмаслиги лозим.

Ушбу ёндашув Россия ахборот маконида тез-тез учраб турадиган тажовузкор риторика учун давлат масъулиятни ўз зиммасига олмаслигини яна бир бор намоён этади. Шу билан бирга, бундай баёнотларнинг олдини олиш ёки уларни қоралаш режалари мавжуд эмаслигини ҳам кўрсатади.

Хулоса қилиб айтганда, Россия ТИВ Соловьёвнинг сўзларидан норози бўлган томонларни гўёки фикрни нотўғри талқин қилганликда ва провокацияга берилганликда айбламоқда.