Тюмен ҳудудига берилган дрон зарбалари қайтарилди — Россия

Россия ҳаво мудофааси кучлари Ғарбий Сибирнинг Тюмен вилоятидаги нефтни қайта ишлаш заводига қилинган дрон ҳужумини қайтарди, деб хабар берди вилоят губернатори.

“Тюмен нефтни қайта ишлаш заводига қилинган дрон ҳужуми қайтарилди. Дрон қолдиқлари тушган жойда фавқулодда хизматлар ишламоқда. Дастлабки маълумотларга кўра, заводга зарар етмаган, ходимлар эса эвакуация қилинган”, — деб ёзди губернатор Александр Моор ўзининг Телеграм-каналида.

Украина чегарасидан 2500 км шарқда жойлашган Тюмен Россиянинг энг муҳим нефть ва газ қазиб олинадиган ҳудудларидан биридир.

Мамлакатдаги энг замонавий ва мураккаб заводлардан бири бўлган Тюмен нефтни қайта ишлаш заводининг номинал қуввати йилига қарийб 8 миллион тоннани ташкил этади.

Саноат манбаларининг ҳисоб-китобларига кўра, у йилига 6 миллион тонна хомашёни қайта ишлаб, қарийб 0,5 миллион тонна бензин ва 2,5 миллион тонна дизель ёқилғиси ишлаб чиқаради.