Tyumen hududiga berilgan dron zarbalari qaytarildi — Rossiya

Rossiya havo mudofaasi kuchlari G‘arbiy Sibirning Tyumen viloyatidagi neftni qayta ishlash zavodiga qilingan dron hujumini qaytardi, deb xabar berdi viloyat gubernatori.

“Tyumen neftni qayta ishlash zavodiga qilingan dron hujumi qaytarildi. Dron qoldiqlari tushgan joyda favqulodda xizmatlar ishlamoqda. Dastlabki ma’lumotlarga ko‘ra, zavodga zarar yetmagan, xodimlar esa evakuatsiya qilingan”, — deb yozdi gubernator Aleksandr Moor o‘zining Telegram-kanalida.

Ukraina chegarasidan 2500 km sharqda joylashgan Tyumen Rossiyaning eng muhim neft va gaz qazib olinadigan hududlaridan biridir.

Mamlakatdagi eng zamonaviy va murakkab zavodlardan biri bo‘lgan Tyumen neftni qayta ishlash zavodining nominal quvvati yiliga qariyb 8 million tonnani tashkil etadi.

Sanoat manbalarining hisob-kitoblariga ko‘ra, u yiliga 6 million tonna xomashyoni qayta ishlab, qariyb 0,5 million tonna benzin va 2,5 million tonna dizel yoqilg‘isi ishlab chiqaradi.