Хитой кемалари Япония назоратидаги оролга кириб борди

Пекин: “Бу ҳудуд Хитойники”

Хитой расмийларига кўра, кемалар Япония назорати остида бўлишига қарамай, Пекин ўз ҳудуди деб ҳисоблайдиган ушбу одам яшамайдиган ороллар атрофида “патруллик вазифасини бажарган”. Хитой бу ҳаракатни “мамлакат ҳуқуқ ва манфаатларини ҳимоя қилиш” деб изоҳлади.

Токио ва Пекин ўртасида кескинлик кучаймоқда

Ҳодиса икки давлат ўртасида сиёсий кескинлик ортган бир пайтга тўғри келди. 7 ноябр куни Япония бош вазири Санаэ Такаичи парламентдаги чиқишида агар Хитой Тайванга ҳужум қилса, Япония ҳарбий жавоб қайтариш эҳтимолини истисно қилмаслигини айтган эди.

Бу баёнот Пекиннинг кескин норозилигига сабаб бўлди. Хитой Токио ҳукуматидан ушбу позицияни қайта кўриб чиқишни талаб қилди ва ўз фуқароларига Японияга бормасликни тавсия этди.

Япония “ядросиз учлик” тамойилларини қайта кўриб чиқиши мумкин

Такаичининг маълум қилишича, сўнгги кунларда Япония 1967 йилда қабул қилинган учта “ядросиз тамойил”ни қайта кўриб чиқиш масаласини муҳокама қилмоқда. Ушбу тамойилларга кўра:

• Япония ядро қуролига эгалик қилмайди,
• уни ишлаб чиқармайди,
• ўз ҳудудига олиб киришга рухсат бермайди.

Агар Токио ушбу тамойиллардан биридан воз кечса, АҚШ ҳарбий кемаларига Япония ҳудудига ядро қуролларини олиб кириш имконияти пайдо бўлиши мумкин.

Хитой–Тайван йўналишида ҳам ҳарбий фаоллик ортмоқда

Тайван мудофаа вазирлиги 16 ноябр куни сўнгги 24 соат ичида орол атрофидаги ҳаво ҳудуди ва ҳудудий сувларга Хитойнинг:

• 30 та ҳарбий самолёти,
• 7 та ҳарбий кемаси кирганини маълум қилди.