Яна Покистон Афғонистонга ҳалокатли зарбалар берди. Қурбонлар бор

Афғонистон ҳукумати расмийлари ва маҳаллий манбаларнинг маълум қилишича, Покистоннинг Афғонистон билан чегара яқинидаги ҳудудларга берган зарбалари оқибатида ҳалок бўлганлар сони камида 12 киши.

“Ўтган тун яна бир бор Афғонистон ҳаво ҳудудини бузган Покистон ҳарбийлари Кунар, Хост ва Пактика вилоятларидаги тинч аҳоли уйларини бомбардимон қилди. 11 нафар бола, бир аёл ва бир эркак ҳалок бўлди ушбу ҳужумлар оқибатида”, — деб ёзди Афғонистон ҳукумати матбуот котиби Забиҳуллоҳ Мужоҳид Х ижтимоий тармоғида.

Хостлик исмини ошкор қилмасликни сўраган расмийнинг AFP агентлигига айтишича, Спера туманидаги бир уйга зарба берилиши натижасида тўққиз киши ҳалок бўлиб, 10 киши жароҳатланган.

Афғонистонга берилаётган зарбалар Покистон ҳудудига ҳужум қилган жангариларга қаратилганини, тинч аҳоли вакиллари қасддан нишонга олинмаслигини таъкидлади Исломобод.

Бу сўнгги ҳафталардаги энг қурбонли зарбалардир. Февраль ойи охирида икки давлат ўртасида низо келиб чиққанидан сўнг чегарада ўрнатилган нисбий осойишталик поёнига етгандек.

Бирлашган Миллатлар Ташкилотининг ўтган ой эълон қилган ҳисоботида айтилишича, жорий йилнинг дастлабки уч ойида бу можарода камида 372 нафар афғонистонлик тинч аҳоли ҳалок бўлиб, 397 нафари яраланган.

Покистон ва Афғонистон 2021 йилда “Толибон” иккинчи марта ҳокимиятни эгаллаганидан буён таранг муносабатда.

Хавфсизлик масалалари, айниқса, Покистоннинг Афғонистондан “Теҳрик-и-Толибон Покистон” (ТТП) жангари гуруҳини жиловлашни талаб қилиши мунозарали нуқтадир.

Исломобод Толибон ҳукуматини ҳужумлар кучайиши ортида турган жангариларга, хусусан, кўп йиллардан бери Покистонга қарши курашаётган ТТПга бошпана берганликда айбламоқда.

Айбловни рад этган Афғонистон расмийларининг таъкидлашича, аслида душман гуруҳларни қўллаб-қувватлаётган ва мамлакат суверенитетини ҳурмат қилмаётган Покистоннинг ўзи.

Зўравонликлар авж олган октябрь ойидан буён икки қўшни ўртасидаги чегара деярли ёпиқлигича қолиши оқибатида икки томонлама савдо ҳам тўхтаб қолди.