Yana Pokiston Afg‘onistonga halokatli zarbalar berdi. Qurbonlar bor

Afg‘oniston hukumati rasmiylari va mahalliy manbalarning ma’lum qilishicha, Pokistonning Afg‘oniston bilan chegara yaqinidagi hududlarga bergan zarbalari oqibatida halok bo‘lganlar soni kamida 13 kishi.

“O‘tgan tun yana bir bor Afg‘oniston havo hududini buzgan Pokiston harbiylari Kunar, Xost va Paktika viloyatlaridagi tinch aholi uylarini bombardimon qildi. 11 nafar bola, bir ayol va bir erkak halok bo‘ldi ushbu hujumlar oqibatida”, — deb yozdi Afg‘oniston hukumati matbuot kotibi Zabihulloh Mujohid X ijtimoiy tarmog‘ida.

Xostlik ismini oshkor qilmaslikni so‘ragan rasmiyning AFP agentligiga aytishicha, Spera tumanidagi bir uyga zarba berilishi natijasida to‘qqiz kishi halok bo‘lib, 10 kishi jarohatlangan.

Afg‘onistonga berilayotgan zarbalar Pokiston hududiga hujum qilgan jangarilarga qaratilganini, tinch aholi vakillari qasddan nishonga olinmasligini ta’kidladi Islomobod.

Bu so‘nggi haftalardagi eng qurbonli zarbalardir. Fevral oyi oxirida ikki davlat o‘rtasida nizo kelib chiqqanidan so‘ng chegarada o‘rnatilgan nisbiy osoyishtalik poyoniga yetgandek.

Birlashgan Millatlar Tashkilotining o‘tgan oy e’lon qilgan hisobotida aytilishicha, joriy yilning dastlabki uch oyida bu mojaroda kamida 372 nafar afg‘onistonlik tinch aholi halok bo‘lib, 397 nafari yaralangan.

Pokiston va Afg‘oniston 2021-yilda “Tolibon” ikkinchi marta hokimiyatni egallaganidan buyon tarang munosabatda.

Xavfsizlik masalalari, ayniqsa, Pokistonning Afg‘onistondan “Tehrik-i-Tolibon Pokiston” (TTP) jangari guruhini jilovlashni talab qilishi munozarali nuqtadir.

Islomobod Tolibon hukumatini hujumlar kuchayishi ortida turgan jangarilarga, xususan, ko‘p yillardan beri Pokistonga qarshi kurashayotgan TTPga boshpana berganlikda ayblamoqda.

Ayblovni rad etgan Afg‘oniston rasmiylarining ta’kidlashicha, aslida dushman guruhlarni qo‘llab-quvvatlayotgan va mamlakat suverenitetini hurmat qilmayotgan Pokistonning o‘zi.

Zo‘ravonliklar avj olgan oktyabr oyidan buyon ikki qo‘shni o‘rtasidagi chegara deyarli yopiqligicha qolishi oqibatida ikki tomonlama savdo ham to‘xtab qoldi.