Мадинада эмас, Ўзбекистонда дарахт экиш керакми?

Унга кўра, ижтимоий тармоқларда "Мадина шаҳрида хурмо экиб, савоб олинг" мазмунидаги пул эвазига бирор шахс номидан кўчат экиш ваъда қилинаётган видеолар айланмоқда. Айрим фуқароларимиз томонидан пул ўтказилганлиги ва уларнинг номидан хурмо кўчатлари экилаётгани ҳам тасвирлари ҳам тарқалмоқда.

Партия раҳбари бундай ташаббуслар нега бошқа мамлакатда амалга ошаётганлигини айтиб, "нима учун ўз маблағларимизни ўзга юртнинг обод бўлиши, бегона одамларнинг қулай шароитда яшашга сарфлашимиз керак?", деган саволни ўртага ташлади.

"Дарахт экиш эзгу амал, бунга ҳеч бир эътироз йўқ. Аммо шу ишни ватанимизда, ота онамиз, яқинларимиз, қолаверса, келажак авлодларимизга нафи тегадиган жойда қилиш тўғри эмасми?! Энг ёмони, бундай пайтда фирибгарлар ҳам "отини қамчилайди". Мадинада дарахт экиш баҳонасида йиғилган пуллар фирибгарлар қўлида йўқ бўлиб кетиш эҳтимоли ҳам катта", дейди Экология партия фракцияси раҳбари Абдушукур Хамзаев

Унинг айтишича, мамлакатда амалга оширилаётган "Яшил макон" умуммилий лойиҳаси юртни обод қилиш, чўлланишга қарши курашиш мақсадида 200 миллион туб кўчат экилган. Аммо бу лойиҳада фуқароларнинг фаоллиги, жонкуярлиги бўлмас экан бу мақсадга эришиш осон бўлмайди.

Хўш, Экология парияси раҳбари сўз очган "Яшил макон" лойиҳаси ўз ваифасини бажармоқдами?

Бош прокуратура 2024 йилнинг 10 июнда эълон қилинган қилинган ҳисоботга кўра, "Яшил макон" умуммилий лойиҳаси доирасида 541 ҳолатда амалда экилмаган 1 миллиондан зиёд кўчатлар қўшиб ёзилганлигини аниқлаган эди. Шунингдек, 441 та ҳолатда эса, 580 минг туп кўчат суғориш тизими мавжуд бўлмаган жойларга экилган. 

Бундан ташқари,  ўтган йилнинг 11 июльда Жиззах вилояти Шароф Рашидов тумани ободонлаштириш бошқармаси томонидан "Яшил макон" умуммиллий лойиҳаси доирасида кўчатларни сотиб олишда 446 млн сўмлик бюджет маблағлари талон-торож қилинганлиги ҳолатлари аниқланган эди. 

Партия раҳбарининг таъкидлашича, “яшил макон” умуммиллий лойиҳаси доирасида экилган дарахтларни сақлаб қолиш бўйича етарлича чоралар кўрилмаяпти, дарахтлар кесилишига муддатсиз мораторий эълон қилинишига қарамасдан дарахт кесиш ҳолатлари тўхтамаяпти.