Мирзиёев Россиядан Тошкентга қайтди. Икки кунлик ташрифдан нималар маълум?

Жорий йилнинг 7 октябрь куни Шавкат Мирзиёев минган самолёт Москванинг "Внуково" аэропортига бориб қўнди. Давлат раҳбарини аэропортда Россия Президенти Владимир Путиннинг ёрдамчиси Максим Орешкин ва бошқа расмий шахслар кутиб олди. Президент матбуот хизмати очиқлаган маълумотларга кўра, ташрифнинг биринчи куни шундай якунланган. Эртаси куни, яъни 8 октябрда Мирзиёев МДҲ давлат раҳбарлари кенгашининг навбатдаги мажлисида иштирок этган.

Тадбир Россия Президенти Владимир Путин раислигида бўлиб ўтган. Саммитда Озарбайжон Республикаси Президенти Илҳом Алиев, Беларус Республикаси Президенти Александр Лукашенко, Қозоғистон Республикаси Президенти Қасим-Жомарт Тоқаев,, Қирғиз Республикаси Президенти Садир Жапаров, Тожикистон Республикаси Президенти Эмомали Раҳмон, Туркманистон Президенти Сердар Бердимуҳамедов ва Арманистон Бош вазири Никол Пашинян, шунингдек, МДҲ бош котиби Сергей Лебедев иштирок этган. 

Мирзиёев саммитда нутқ сўзлаб, нутқида Россиянинг МДҲ раислиги даврида кўп томонлама ҳамкорликнинг барча йўналишларида ривожланганини юқори баҳолаб, мамлакатларининг хавфсизлиги ва барқарор ривожланишини таъминлаш билан боғлиқ вазиятга алоҳида эътибор қаратиши кераклигини таъкидлаган. Шунингдек, Президент МДҲ мамлакатлари махсус хизматлари ва ваколатли идораларининг тизимли ҳамкорлигини йўлга қўйиш, бугунги таҳдидларга қарши курашиш усулларини такомиллаштириш, киберхавфсизликни таъминлаш соҳасида келишилган чоралар ҳамда дастурий ҳужжатларни қабул қилиш муҳимлигига эътибор қаратиш кераклигини билдирган. 

Саммитда Ўзбекистоннинг МДҲ мамлакатлари билан товар айирбошлаш ҳажми йил бошидан буён 16 фоизга ошгани ҳам тилга олинган ҳамда 2025 йил баҳорида Тошкент шаҳрида "Иннопром" халқаро саноат кўргазмаси доирасида МДҲ Иқтисодий кенгаши йиғилиши ва Инновацион ривожланиш форумини ўтказиш таклиф этилган. Шунингдек, МДҲ мамлакатлари етакчи таҳлилий марказларининг Тошкент конференцияси бўлиб ўтганида интернет технологиялари ва "катта маълумотлар" индустриясини ривожлантириш, рақамли ечимларни жорий этиш, креатив иқтисодиёт, яшил энергетика ва ядро технологиялари, иқлим муаммоларни ўрганиш муҳокама қилингани ҳам тадир давомида келтириб ўтилган. 

Бундан ташқари, саммит қатнашувчилари томонидан Самарқанд шаҳрида сунъий интеллектни ривожлантириш масалаларига бағишланган МДҲ мамлакатлари экспертлари ва таҳлилчиларининг учрашувларини ўтказиш таклиф этилган. Гуманитар алмашинувларни кенгайтириш мақсадида Ҳамдўстлик давлатлари маданияти кунларини ўтказиш кераклиги ҳам билдирилган. Шу билан бирга, соғлиқни сақлаш, таълим, санъат, кино, туризм ва спорт соҳаларида қўшма тадбирлар дастурини ҳар йили тайёрлаш зарурлиги билдирилган. 

Саммитда Ўзбекистонда шахмат ва футбол бўйича ёшлар жамоалари ўртасида МДҲ очиқ кубоги мусобақалари ўтказилиши режалаштирилаётгани маълум қилинган. Тадбир якунида эса Ўзбекистон Президенти Тожикистон Республикаси Президенти Эмомали Раҳмонни 2025 йилда ташкилотга раисликни қабул қилгани билан табриклаган. Ҳамда МДҲ доирасидаги ҳамкорликнинг устувор йўналишлари бўйича бир қатор битим ва қарорлар қабул қилинган. Бироқ мазкур қарорлар нималарни ташкил этилиши ҳануз очиқланмади. 

Шу билан Ўзбекистон раҳбарининг Москва шаҳрига қилган ташрифи якунланди. Давлат раҳбари Тошкентга келди. Уни "Внуково" халқаро аэропортигача Россия Федерацияси саноат ва савдо вазири Антон Алиханов ҳамда бошқа расмий шахслар кузатиб қўйган.