Шавкат Мирзиёевнинг Кореяга ташрифи: дўстлик ва ҳамкорлик

Самимий табассумлар ва эркин суҳбатлар мамлакатларимиз ҳамда уларнинг етакчилари ўртасидаги ўзаро ишончни яққол намоён этди.

Корея Республикасининг Ўзбекистондаги собиқ элчиси Ли Ук Хён билан суҳбат алоҳида самимий кечди. Учрашув давомида ўтган йиллар, Ўзбекистон–Корея дўстлигини мустаҳкамлаш йўлида биргаликда амалга оширилган ишлар ёдга олинди.

Саммит арафасида давл раҳбари Корея Республикаси Миллий Ассамблеяси Спикери учун корейс тилига таржима қилинган «Мирзиёев доктринаси» китобига мамнуният билан дастхат ёзиб берди. Бу Янги Ўзбекистон ғоялари ва ислоҳотларига бўлган қизиқишнинг яна бир ифодаси бўлди.

Кореялик дўстларимиз давлат ташрифига алоҳида эътибор ва эҳтиром кўрсатди. Жанубий Кореянинг энг баланд биноси — Lotte World Tower ҳамда Сеул телеминорасида Ўзбекистон байроғининг тасвирлари намоён бўлди.

Президент ташрифи шарафига Ўзбекистон байроғи рангларидаги дирижабль парвоз қилди. Қароргоҳ олдидаги фавворада эса Ўзбекистон давлат герби ва байроғи тасвирлари акс эттирилди.

Мазкур эътибор ва рамзий ифодалар мезбонларнинг самимий меҳмондўстлиги ҳамда юксак ҳурматини намоён этди.

Муаллиф: Ҳасанбой ОЧУН