Шавкат Мирзиёев 7–9 октябрь кунлари Туркманистонда бўлади

Давлат раҳбари ташриф доирасида «Аваза» миллий сайёҳлик зонасида бўлиб ўтадиган Марказий Осиё ва Озарбайжон давлат раҳбарларининг саккизинчи Маслаҳат учрашуви ҳамда Мустақил Давлатлар Ҳамдўстлигининг навбатдаги саммитида иштирок этади.

Маслаҳат учрашувида нималар муҳокама қилинади?

Марказий Осиё ва Озарбайжон давлат раҳбарларининг Маслаҳат учрашуви кун тартибидан минтақавий ҳамкорликни янада ривожлантиришга қаратилган қатор масалалар ўрин олган.

Хусусан, сиёсий-дипломатик ҳамкорликни мустаҳкамлаш, савдо-иқтисодий алоқаларни чуқурлаштириш ва энергетика соҳасидаги шерикликни кенгайтириш масалалари муҳокама қилинади.

Шунингдек, атроф-муҳитни муҳофаза қилиш, иқлим ўзгаришига мослашиш бўйича қўшма чора-тадбирларни амалга ошириш, маданият, таълим ва илм-фан соҳаларидаги ҳамкорликни ривожлантириш ҳамда ёшлар ўртасидаги алоқаларни кенгайтиришга эътибор қаратилади.

Учрашувда минтақавий ва халқаро аҳамиятга молик долзарб масалалар юзасидан фикр алмашиш ҳам режалаштирилган. Тинчлик, барқарорлик ва хавфсизликни таъминлашга оид устувор вазифалар ҳам муҳокама қилинади.

MDH саммитида ҳам иштирок этади

Шавкат Мирзиёев Туркманистонда Мустақил Давлатлар Ҳамдўстлиги давлат раҳбарлари кенгашининг навбатдаги йиғилишида ҳам иштирок этади.

Йиғилишда Ҳамдўстлик доирасидаги кўп томонлама ҳамкорликнинг жорий натижалари сарҳисоб қилиниб, уни янада ривожлантириш истиқболлари муҳокама қилинади.

Саммитда Мустақил Давлатлар Ҳамдўстлиги ташкил этилганининг 35 йиллигини нишонлаш масаласига ҳам алоҳида эътибор қаратилиши кутилмоқда.
Тадбирлар якунида қўшма ҳужжатлар тўпламини қабул қилиш режалаштирилган.

Қатор икки томонлама учрашувлар режалаштирилган

Ташриф дастурига мувофиқ, Ўзбекистон Президентининг хорижий давлатлар раҳбарлари билан қатор икки томонлама учрашувлар ўтказиши ҳам кўзда тутилган.

Уларда сиёсий, савдо-иқтисодий, энергетика, транспорт, маданият ва бошқа соҳалардаги ҳамкорликни янада ривожлантириш масалалари муҳокама қилиниши мумкин.

Шавкат Мирзиёевнинг Туркманистонга мазкур амалий ташрифи Марказий Осиё давлатлари ўртасидаги минтақавий ҳамкорликни янада мустаҳкамлаш, иқтисодий шерикликни кенгайтириш ва минтақавий хавфсизлик масалалари бўйича умумий ёндашувларни мувофиқлаштириш нуқтаи назаридан муҳим аҳамият касб этади.

Муаллиф: Ҳасанбой ОЧУН