Япония раҳбари лавозимини илк бор аёл киши — Санаэ Такаити эгаллади

Санаэ Такаити партия раҳбарлиги учун бўлиб ўтган овоз беришнинг якуний босқичида 44 ёшли қишлоқ хўжалиги вазири Синдзиро Коидзумини ортда қолдирди. Энди у мамлакатнинг энг олий давлат лавозимини эгаллаши кутилмоқда.

Қадимий Нара шаҳрида туғилган Такаити сиёсий сулоладан эмас. Онаси полицияда хизмат қилган, отаси эса автомобиль компаниясида ишлаган. У бизнес бошқаруви бўйича маълумотга эга бўлиб, ёшлигида хеви-металга қизиққан ва талабалик пайтида барабан чалган.

Сиёсий фаолиятини Такаити АҚШдаги тажрибасидан сўнг бошлаган — у ерда конгресмен аёл Патриция Шредер идорасида ишлаган. Ватанга қайтгач, янгиликлар етказувчиси сифатида фаолият юритган. 1992 йилда илк бор парламент сайловида қатнашиб, мағлуб бўлган. Бир йилдан сўнг, 1993 йилда отасининг молиявий кўмаги билан иккинчи марта сайловда иштирок этиб, ғалаба қозонган. Шу вақтдан бери у тўққиз марта қайта сайланган.

Такаити ўзининг консерватив қарашлари билан танилган. У бир жинсли никоҳларни қонунийлаштиришга қарши ва турмуш ўртоқлар учун алоҳида фамилия жорий этиш ғоясини қўллаб-қувватламайди. Шунингдек, Такаити аёлларга император тахтини мерос қилиб олиш ҳуқуқи бериш имкониятини ҳам рад этади.