Жаҳон чемпионатидаги ирқчилик можароси: кореялик блогерни ҳақорат қилган муҳандис ишдан ҳайдалди

Ҳодиса Жанубий Корея ва Чехия ўртасидаги ўйин вақтида юз берган. Ижтимоий тармоқларда Ino Cat номи билан танилган жанубий кореялик блогер Юн Су Жин трибунада видео тасвирга олаётган вақтда унинг орқасида ўтирган мухлис камерага қараб осиёликларга нисбатан ҳақорат ҳисобланадиган "қисиқ кўз" ишорасини қилган.

Блогер видеони «Жаҳон чемпионатига келиб ирқчиликка дуч келсангиз...» деган изоҳ билан ижтимоий тармоқларга жойлаштирди. Видеони миллионлаб одамлар кўрди ва воқеа катта норозиликларга сабаб бўлди.

Ирқчи мухлис ким эди?

Кейинчалик интернет фойдаланувчилари қоидабузарнинг шахсини аниқлашди. У Мексиканинг Халиско штати Геоматика ва топография муҳандислари коллегияси (CITGEJ) президенти Улисес Фернандо Бернал Мирамонтес экани маълум бўлди.

Жамоатчилик босимидан сўнг CITGEJ раҳбарияти ички текширув ўтказиб, Бернални президентлик лавозимидан озод қилди. У эса инглиз ва испан тилларида оммавий кечирим сўраб, қилган ҳаракати учун афсусда эканини билдирди.

ФИФА қандай чора кўрди?

ФИФА мазкур ҳолатдан кейин мухлиснинг чипта сотиб олиш аккаунтини блоклаганини маълум қилди. Шунингдек, ташкилот ирқчиликка қарши қатъий позициясини намойиш этиш мақсадида Юн Су Жинни Жанубий Корея — Мексика учрашувига махсус меҳмон сифатида таклиф қилди.

ФИФАнинг таъкидлашича, мазкур ташаббус спортда ҳурмат, тенглик ва камситишга қарши кураш ғояларини қўллаб-қувватлашга қаратилган.

Ушбу воқеа Жаҳон чемпионати давомида спорт майдонларида ирқчилик ва нафрат тилига қарши кураш янада кучайтирилиши лозимлигини кўрсатган энг муҳокамали ҳолатлардан бирига айланди.