Тошкент ИЭС бўйича видео ҳақиқатга тўғри келмайди — Энергетика вазирлиги

Хабарда таъкидланишича, видео тарқалган пайтда Тошкент ИЭСда асосий ёқилғи сифатида табиий газ, вақтинчалик захира сифатида эса қисқа муддат мазут ишлатилган.

Ҳозирги ҳолат бўйича расмий маълумот

Вазирликнинг маълумот беришича, Тошкент ИЭСда ўрнатилган “енгли фильтр” қурилмаси чиқиндиларни 99,5 фоиз самара билан тозалайди. Бу орқали ҳавога чиқариладиган қаттиқ заррачалар миқдори 100 mg/m³ дан 6 mg/m³ гача камайган.

Шунингдек, станцияда:

• тутун газлари таркибини аниқ ўлчайдиган автоматик мониторинг тизими,
• маълумотларни реал вақт режимида Экология ва иқлим ўзгариши миллий қўмитасига узатувчи датчиклар,
• санитария-ҳимоя ҳудудида ўрнатилган замонавий экопост

фауолият кўрсатмоқда.

Расмий ахборотга кўра, жорий куз-қиш мавсуми бошланганидан бери станцияда мазут умуман ишлатилмаган, объект тўлиқ табиий газ асосида ишламоқда.

Нотўғри маълумот тарқатмаслик бўйича огоҳлантириш

Вазирлик жамоатчиликни ва блогерларни тасдиқланмаган маълумотларни тарқатмасликка чақирар экан, бундай ҳолатлар учун амалдаги қонунчиликда жавобгарлик белгиланганини эслатди.