Учтепадаги гаражлар тақдири: Уларни бузишга ким буйруқ берган?

Маълум бўлишича, бир неча йиллардан буён Учтепа тумани 11-мавзесида яшовчи аҳоли ўз гаражларини турли қурувчилардан ҳимоя қилган ҳолда курашиб келмоқда.

"2018 йилда қурилишга ер ажратиш тўғрисида 618-рақамли қарор чиқарилди. 2020 йилда бу қарор суд томонидан ноқонуний деб топилди. Аммо ўша йили ҳудудимизга 30 кишилик гуруҳ келиб, бизнинг гаражларимизни бузишни бошлади. Биз жамоатчилик фаоли Саодат Абдузакировага мурожаат қилдик ва у бизни шаҳар ҳокимиятининг матбуот котиби билан боғлашда ёрдам берди. Шу орқали биз 618-қарорни бекор қилишга эришдик. Бу қарорни ҳоким ўша пайтда ноқонуний деб эълон қилган эди", дейди PARDIGMA.UZ'га мурожаат йўллаган М.М. исмли фуқаро.

Унинг сўзларига кўра, 2022 йилга келиб 618-қарор яна қонуний бўлиб қолган. Аҳоли эса бу қарор устидан судга мурожаат қилган. 2024 йилга келибгина қарор суд томонидан ноқонуний деб топилган.

"2024 йилнинг кузида биз Учтепа туман ҳокими билан учрашдик. У бизга ҳеч ким гаражларимизни бузмаслигини ва уларни сақлаб қолиш учун жавобгарликни шахсан бўйнига олишини ваъда қилди. Ҳолат яқинда яна кескинлашди. Учтепа туман прокурори Баҳодир Шеранов бизга гаражларимизни бузиш ва ўрнида хиёбон қуришни таклиф қилди. Биз эса фақат барча ҳужжатлар тикланганидан сўнг, бу масалани муҳокама қилишга тайёр эканлигимизни билдирдик. Шу вақтдан бошлаб ҳақиқий таъқиб бошланди. Доимий равишда солиқ инспекторлари, ёнғин хавфсизлиги ва бошқа хизматлар томонидан текширувлар ўтказилди", дейди М.М.

Ҳокимият берган ваъдаларга қарамай жорий йилнинг 3 март куни ҳудудга гаражларни бузиш учун ишчи гуруҳ техникалар билан етиб борган. Бир гуруҳ фуқаролар бузилиш жараёнини тўхтатишга ҳаракат қилган, аммо чақирилган ички ишлар ходимлари томонидан улар олиб кетилган. 

Уларга нисбатан Ўзбекистон Республикаси Маъмурий жавобгарлиги тўғрисидаги кодексининг 194-моддаси "Ички ишлар органлари ходимларининг қонуний талабларини бажармаслик" бўйича айблов эълон қилинган ҳамда ҳибсга олинган.

"Гаражларни бузиш учун ҳудудга техникаси билан кириб келган қурувчиларга аҳоли томонидан қаршилик кўрсатилгани учун ички ишлар ходимлари келиб, фуқароларнинг бир нечтасини олиб кетди. Шунингдек, юз бераётган воқеаларни видеотасвирга олиш тақиқланди. Олиб кетилганлардан — гараж эгаси Х.М., фуқаро К.И. ва яна уч нафар фаолга суд томонидан 5 суткадан қамоқ жазоси тайинланди”, дейди мурожаатчи.

Гаражларни бузиб ташлаш суд томонидан тақиқланилган бўлса-да, бу иш амалга оширилди. Бундан ташқари, қонун томонида туриб, ўз ҳуқуқларини ҳимоя қилмоқчи бўлган фуқаролар қамоққа солинди. Шу биргина мисол орқали ҳам мамлакатда қонун устуворлигининг қай даража эканлигини билиш мумкин.