Uchtepadagi garajlar taqdiri: Ularni buzishga kim buyruq bergan?

Ma’lum bo‘lishicha, bir necha yillardan buyon Uchtepa tumani 11-mavzesida yashovchi aholi o‘z garajlarini turli quruvchilardan himoya qilgan holda kurashib kelmoqda. 

"2018-yilda qurilishga yer ajratish to‘g‘risida 618-raqamli qaror chiqarildi. 2020-yilda bu qaror sud tomonidan noqonuniy deb topildi. Ammo, o‘sha yili hududimizga 30 kishilik guruh kelib, bizning garajlarimizni buzishni boshladi. Biz jamoatchilik faoli Saodat Abduzakirovaga murojaat qildik va u bizni shahar hokimiyatining matbuot kotibi bilan bog‘lashda yordam berdi. Shu orqali biz 618-qarorni bekor qilishga erishdik. Bu qarorni hokim o‘sha paytda noqonuniy deb e’lon qilgan edi", deydi PARADIGMA.UZ’ga murojaat yo‘llagan M.M. ismli fuqaro.

Uning so‘zlariga ko‘ra, 2022-yilga kelib 618-qaror yana qonuniy bo‘lib qolgan. Aholi esa bu qaror ustidan sudga murojaat qilgan. 2024-yilga kelibgina qaror sud tomonidan noqonuniy deb topilgan.

"2024-yilning kuzida biz Uchtepa tuman hokimi bilan uchrashdik. U bizga hech kim garajlarimizni buzmasligini va ularni saqlab qolish uchun javobgarlikni shaxsan bo‘yniga olishini va’da qildi. Holat yaqinda yana keskinlashdi. Uchtepa tuman prokurori Bahodir Sheranov bizga garajlarimizni buzish va o‘rnida xiyobon qurishni taklif qildi. Biz esa faqat barcha hujjatlar tiklanganidan so‘ng, bu masalani muhokama qilishga tayyor ekanligimizni bildirdik. Shu vaqtdan boshlab haqiqiy ta’qib boshlandi. Doimiy ravishda soliq inspektorlari, yong‘in xavfsizligi va boshqa xizmatlar tomonidan tekshiruvlar o‘tkazildi", deydi M.M.

Hokimiyat bergan va’dalarga qaramay joriy yilning 3-mart kuni hududga garajlarni buzish uchun ishchi guruhlar texnikalar bilan yetib borgan. Bir guruh fuqarolar buzilish jarayonini to‘xtatishga harakat qilgan, ammo chaqirilgan ichki ishlar xodimlari tomonidan ular Ichki ishlar binosiga olib ketilgan. 

Ularga nisbatan O‘zbekiston Respublikasi Ma’muriy javobgarligi to‘g‘risidagi kodeksining 194-moddasi bo‘yicha "Ichki ishlar organlari xodimlarining qonuniy talablarini bajarmaslik" bo‘yicha ayblov e’lon qilingan hamda hibsga olingan.

"Garajlarni buzish uchun hududga texnikasi bilan kirib kelgan quruvchilarga aholi tomonidan qarshilik ko‘rsatilgani uchun ichki ishlar xodimlari kelib, fuqarolarning bir nechtasini olib ketdi. Shuningdek, yuz berayotgan voqealarni videotasvirga olish taqiqlandi. Olib ketilganlardan garaj egasi X.M., fuqaro K.I. va yana uch nafar faolga sud tomonidan 5 sutkadan qamoq jazosi tayinlandi", deydi murojaatchi.

Garajlarni buzib tashlash sud tomonidan taqiqlanilgan bo‘lsa-da, bu ish amalga oshirildi. Bundan tashqari, qonun tomonida turib, o‘z huquqlarini himoya qilmoqchi bo‘lgan fuqarolar qamoqqa solindi. Shu birgina misol orqali ham mamlakatda qonun ustuvorligining qay darajada ekanligini bilish mumkin.