2026 йилдан чиқинди хизматлари учун тўловлар фақат онлайн амалга оширилади

Энди уйма-уй юриб тўлов ундириш амалиёти тўхтатилади, деб хабар берди Чиқиндиларни бошқариш ва циркуляр иқтисодиётни ривожлантириш агентлиги.

Агентлик маълумотига кўра, мазкур чора-тадбирлар аҳоли учун қулай тўлов тизимини яратиш, ҳисоб-китобларда шаффофликни таъминлаш ҳамда коррупция ҳолатларининг олдини олишга қаратилган.

 Тўловларни амалга ошириш усуллари:
– агентликнинг «Тоза макон» биллинг тизими орқали;
– барча электрон тўлов платформалари орқали;
– интернет алоқаси йўқ, олис ҳудудларда яшовчилар учун банк кассалари ва “Ўзбекистон почтаси” бўлимлари орқали.

Шунингдек, чиқинди хизмати бўйича қарздорлик мавжуд бўлган истеъмолчиларга SMS орқали хабардорнома юборилади ва қарз тўланганигача электр энергияси учун тўлов қабул қилиш вақтинчалик чекланади.

Янги тизим доирасида аҳоли тез орада чиқинди машиналарининг келиш вақти ва йўналишини онлайн кузатиш имкониятига ҳам эга бўлади.