Акмал Шукуров иши: апелляцияда қарор чиқарган судялар лавозимидан четлатилди

Бу ҳақда Судялар олий кенгаши матбуот хизмати маълум қилди.

Маълум қилинишича, Тошкент шаҳар судининг жиноят ишлари бўйича судялари — Одилбек Илҳомжонов, Мирзиёд Абидов ва Муҳтарама Турғунова, шунингдек, суд раиси ўринбосари, жиноят ишлари бўйича судлов ҳайъати раиси Муроджон Мирзажонов одил судловни амалга ошириш чоғида қонунийликни бузгани учун лавозимидан озод қилинган. Уларнинг судялик ваколатлари муддатидан илгари тугатилган.

Судялар олий кенгаши маълумотига кўра, мазкур қарор Акмал Шукуров иши билан боғлиқ ҳолда қабул қилинган. Судялар «Судлар тўғрисида»ги қонуннинг 79-моддаси асосида жазога тортилган.

Шунингдек, президентнинг 2025 йил 25 декабрдаги фармойиши билан Муроджон Мирзажонов ҳам ёзма аризасига биноан лавозимидан озод этилган. Унинг ўрнига Фарҳоджон Ғаниев Тошкент шаҳар суди раиси ўринбосари этиб тайинланган. У бунга қадар Андижон вилоят суди раиси лавозимида фаолият юритган.

Андижон вилоят суди раиси ўринбосари лавозимига эса Муроджон Абабакиров тайинланган.

Акмал Шукуров иши ҳақида

Акмал Шукуровга нисбатан қўзғатилган жиноят иши бешта эпизодни ўз ичига олган бўлиб, энг катта жамоатчилик эътиборини тортган ҳолат жорий йил сентябрь ойида Яккасарой туманида жойлашган The Tower меҳмонхонаси олдида содир бўлган жанжал билан боғлиқ.

Ушбу воқеада жабрланувчи Борис Авакян оғир тан жароҳати олиб, комага тушган. Акмал Шукуров воқеа жойидан қочиб кетган, кейинчалик Қозоғистонда қўлга олиниб, Ўзбекистонга экстрадиция қилинган.

Мирзо Улуғбек туман суди 2025 йил 24 октябрда Акмал Шукуровни қасддан баданга оғир шикаст етказиш, фирибгарлик ва безориликда айбдор деб топиб, 8 йил 1 ой озодликдан маҳрум қилиш жазосини тайинлаган.

Бироқ Тошкент шаҳар суди апелляция инстанцияси 9 декабрда ушбу жазони 4 йил 1 ой озодликни чеклашга алмаштириб, уни суд залидан озод қилган. Бу қарор жамоатчиликда кескин норозилик уйғотган.

Шундан сўнг, прокуратура протести асосида иш тафтиш инстанциясида қайта кўриб чиқилиб, Акмал Шукуровга 6 йил озодликдан маҳрум қилиш жазоси тайинланган ва у яна қамоққа олинган. Бу ҳолатдан кейин апелляция қарорини чиқарган судяларга нисбатан хизмат текшируви бошланган.