Мактаб ва олий таълим муассасаларида хавфсизлик чоралари кучайтирилади

Вазирлар Маҳкамасининг янги қарорига мувофиқ, умумий ўрта, ўрта махсус, профессионал ва олий таълим муассасаларида замонавий хавфсизлик тизимлари босқичма-босқич жорий этилади.

Кириш ва чиқиш ҳақидаги маълумотлар камида уч ой давомида сақланади.

Шунингдек, муассасалар ҳудудига кириш биометрик идентификация воситалари — бармоқ изи, кўз гавҳари ёки бошқа рухсат этувчи идентификаторлар орқали амалга оширилиши мумкин. Барча кириш-чиқишлар электрон журналда қайд этилади.

Қарорга мувофиқ, бегона шахсларнинг таълим муассасалари ҳудудига рухсатсиз киришига йўл қўйилмайди. Ташриф буюрувчилар учун ҳам алоҳида назорат тартиби жорий этилади.

Бундан ташқари, мактаблар ва бошқа таълим муассасаларининг ҳудуди, кириш жойлари, назорат пунктлари, йўлаклар, ошхоналар ҳамда спорт майдонлари замонавий видеокузатув камералари билан жиҳозланади. Видеоёзувлар камида бир ой сақланиши белгиланган.

Ҳужжатга мувофиқ, таълим муассасаларида фавқулодда вазиятларда тезкор огоҳлантириш, қўриқлаш ва бошқа хавфсизлик тизимларини ҳам жорий этиш режалаштирилган.