“Ўқитувчиларнинг ортида армия бор, «погонлилар» бор, Президентимиз бор” — Тошкентдаги мактаб можароси бўйича расмий баёнот берилди

Маълумотларга кўра, 19 май куни информатика фани ўқитувчиси ва 9-синф ўқувчилари ўртасида дарс жараёнида низо келиб чиққан. Илк босқичда ўқитувчига нисбатан жиноий иш қўзғатилган бўлса-да, кейинчалик текширув натижалари асосида ушбу иш тугатилган.

Расмий хулосада айтилишича, ўқитувчи ўқув жараёнини сақлаш ва ўз шаънини ҳимоя қилиш доирасида ҳаракат қилган. Шунингдек, айрим ўқувчилар дарс интизомига риоя қилмагани, ўқитувчига нисбатан ҳурматсиз муносабатда бўлгани қайд этилган.

Текширув давомида ўқувчиларнинг хулқ-атвори ва ота-оналарнинг фарзанд тарбиясидаги масъулияти ҳам ўрганилган. Маълум қилинишича, тарбияда камчиликка йўл қўйган ота-оналарга нисбатан тегишли чоралар кўрилиши мумкин.

Ички ишлар вазирининг биринчи ўринбосари Рустам Жўраев мазкур ҳолат юзасидан фикр билдириб, ўқитувчилар давлат ҳимоясида эканини таъкидлади.

— Ўқитувчиларнинг ортида армия бор, “погонлилар” бор, Президентимиз бор, — деди у.

Тошкент шаҳар ИИББ бошлиғи Равшан Султанходжаев эса бундан кейин ўқитувчиларга нисбатан ҳақорат ёки тажовуз ҳолатлари жавобсиз қолмаслигини билдирди.