Ходимларга Янги йил мукофоти берилиши шартми?

Вазирлик маълум қилишича, Меҳнат кодексининг 252-моддасига (рағбатлантирувчи хусусиятга эга тўловлар) мувофиқ, мукофотлар ва бошқа рағбатлантирувчи тўловларни бериш тартиби иш берувчи томонидан белгиланади ҳамда жамоа шартномаси ёки ички ҳужжатлар билан расмийлаштирилади.

«Агар ички ҳужжатларда барча ходимларга байрам муносабати билан мукофот бериш мажбурияти белгиланган бўлса, иш берувчи уни беришга мажбур. Акс ҳолда, бу қарздорликка олиб келади. Агар бундай мажбурият назарда тутилмаган бўлса, мукофот бериш мажбурий эмас ва ихтиёрий ҳисобланади», — дейилади вазирлик хабарида.

Шунингдек, таъкидланишича, мукофотлаш жараёнида камситишга йўл қўйилмаслиги лозим. Меҳнат кодексининг 4-моддасига (меҳнат ҳуқуқларининг тенглиги ва меҳнат соҳасида камситишни тақиқлаш) кўра, жинс, ёш, лавозим ёки меҳнат натижаларига боғлиқ бўлмаган бошқа белгилар асосида фарқ қўйиш камситиш ҳисобланади.

Қонунчиликка мувофиқ, байрам мукофотини байрамдан олдин ҳам, кейин ҳам бериш мумкин — аниқ муддат белгиланмаган. Бюджет ташкилотларида эса мукофотлаш тартиби фақат қонун ҳужжатларида назарда тутилган ҳолларда амалга оширилади.