Ягона намунадаги электрон гувоҳнома жорий этилди

Бу ҳақда Вазирлар Маҳкамасининг “Автомототранспорт воситалари ва шаҳар электр транспорти воситалари ҳайдовчиларини тайёрлаш ҳамда қайта тайёрлаш бўйича нодавлат таълим хизматларини кўрсатиш фаолиятини лицензиялаш тартибини янада такомиллаштириш чора-тадбирлари тўғрисида” 2018 йил 31 майдаги 408-сон қарорга ўзгартириш ва қўшимчалар киритиш ҳақидаги Ҳукумат қарори (№642, 15.10.2025 й.) қабул қилинди.

Қарорга кўра, автомототранспорт ва шаҳар электр транспорти ҳайдовчиларини тайёрлаш ёки қайта тайёрлаш бўйича таълимни тугатиб, имтиҳонларни муваффақиятли топширган номзодларга ўқув ташкилоти томонидан имтиҳон комиссияси баённомаси асосида ягона намунадаги электрон гувоҳнома расмийлаштирилади.

Электрон гувоҳномалар ДЙҲХХ Ягона ахборот тизимидаги “e-avtota’lim.uz” модули орқали автоматик шакллантирилади. Унда номзоднинг ўқув ташкилотида таълимни тугатганлиги ва имтиҳондан ўтгани ҳақидаги маълумотлар акс этади.

Бундан ташқари, мазкур электрон гувоҳнома миллий ҳайдовчилик гувоҳномасини олиш учун зарур бўлган назарий ва амалий имтиҳонлар жараёни билан боғлиқ давлат хизматларини кўрсатувчи субъектларга “e-avtota’lim.uz” орқали реал вақт режимида автоматик равишда тақдим этилади.

Шунингдек, қарорда электрон гувоҳнома учун ҳеч қандай йиғим ундирилмаслиги ҳам белгилаб қўйилган.