Вояга етмаган қизга шилқимлик қилган 60 ёшли фуқаро уч суткага қамалди

Қайд этилишича, жорий йилнинг 15 сентябрь куни аёл ҳуқуқни муҳофаза қилувчи органларига мурожаат қилиб, спиртли ичимликлар таъсирида бўлган бегона бир эркак унинг ёш қизига яқинлашиб, юзидан ўпиб, бағрига босганини билдирган. 

Аёлга кўра, ҳодиса унинг қизи билан бирга бозорга озиқ-овқат сотиб олиш учун борганида юз берган. Қиз чарчоқ сабабли ўриндиққа ўтирган вақтда, онаси шу атрофдаги дўконга кирган. Дўкондан чиққанида эса қизини таниш бўлмаган бир эркак бағрига босиб, юзидан ўпаётганини кўриб қолган. Онаси дарҳол қизининг ёнига югуриб, эркакни итариб, қизидан қўлини тортишни талаб қилган. Бироқ ширакайф эркак аёлни ҳақоратлаган. 

Мазкур ҳолат ҳуқуқни муҳофаза қилиш органларига етказилгандан сўнг, ўрганилган. Аниқланишича, қизга шилқимлик қилган фуқаро Тошкент вилоятида туғилган, 60 ёшли эркак бўлиб чиққан. Сўнг эркак ушланиб, унга нисбатан иш судга оширилган. Судда фуқаро ўзининг айбини тан олмасдан, қизча унинг набирасини эслатганлигини учун уни эркалаганини айтган. Шунингдек, у спиртли ичимлик ичмаганини ҳам билдирган. 

Шу йилнинг 30 сентябрь куни юқоридаги ҳолат юзасидан Мирзо Улуғбек тумани Жиноят ишлар бўйича судида якуний суд қарори ўқиб эшиттирилган. Унда эркак Маъмурий жавобгарлик тўғрисидаги кодексининг 41-1-моддаси (Жинсий тегажоғлик) бўйича ҳуқуқбузарлик содир этганликда айбдор деб топилган ва унга 3 сутка маъмурий қамоқ жазоси тайинланган.