Bu haqda Iroq Mudofaa vazirligiga tayanib, CNN xabar berdi.

Al-Asad aviabazasi Iroq nazoratiga oʻtdi

Iroq Mudofaa vazirligi maʼlum qilishicha, AQSh harbiy maslahatchilarining soʻnggi kontingenti mamlakat gʻarbidagi Anbar viloyatida joylashgan Al-Asad aviabazasini tark etgan. Ushbu baza 20 yildan ortiq vaqt davomida AQSh qoʻshinlari foydalanib kelgan asosiy obʼektlardan biri hisoblanar edi.

Shuningdek, IShIDga qarshi kurash doirasida faoliyat yuritgan AQSh yetakchiligidagi koʻp millatli koalitsiya ham “Birlashgan operatsiyalar qoʻmondonligi” qarorgohidan chiqib ketgan. Vazirlikka koʻra, barcha binolar va infratuzilma obʼektlari endilikda Iroq xavfsizlik kuchlarining toʻliq nazoratiga oʻtgan.

Iroq Mudofaa vazirligi eʼlon qilgan videolarda yuqori martabali harbiy qoʻmondonlar Al-Asad aviabazasidagi boʻsh qolgan binolar va yoʻlaklarni koʻzdan kechirayotgani aks etgan. AQSh Mudofaa vazirligining Markaziy qoʻmondonligi (CENTCOM) ham obʼektlarni topshirish jarayoni yakunlanganini tasdiqladi.

Kurdiston hududi bundan mustasno

Maʼlum qilinishicha, AQSh qoʻshinlarining chiqib ketishi faqat Iroqning federal hududlariga taalluqli. Mamlakat shimolidagi yarim mustaqil hudud — Iroq Kurdistonida Amerika harbiylari qolmoqda.

Xususan, Arbil viloyatida joylashgan Harir aviabazasida AQSh qoʻshinlari hali ham mavjud. Iroq markaziy hukumati mazkur hududni toʻliq nazorat qilmaydi, chunki Kurdiston Iroq konstitutsiyasiga muvofiq oʻz hukumati, parlamenti va xavfsizlik kuchlariga ega boʻlgan avtonom federal subʼekt hisoblanadi.

#Baza

AQSh harbiylari Iroqdagi bazasini tark etdi