Chorsu by Manar/Yangi Chorsu (yakuniy nomi belgilanmagan) loyihasiga koʻra, sobiq Chorsu mehmonxonasi oʻrnida umumiy maydoni 100 ming kvadrat metrdan ortiq boʻlgan koʻp funksiyali majmua barpo etiladi.

Hududning asosiy qismi uy-joy uchun ajratiladi — 38,3 ming kv.metr. Savdo zonalari va mehmonxona maydonlari uchun har biriga 20 ming kv.metrdan ajratiladi. Yana 14 ming kv.metr ofis maydonlarini tashkil etadi.

Developer oʻz press-relizida taʼkidlashicha, loyiha turar-joy, xalqaro darajadagi mehmonxona, zamonaviy biznes klasteri, piyodalar koʻchalari, yashil hududlar va dam olish maydonchalari boʻlgan jamoat joylarini qamrab oladi.

Arxitekturaviy konsepsiya muallifi rus va nemis meʼmori, Germaniya meʼmorlari uyushmasi (BDA) aʼzosi, Thoban Voss asoschisi Sergey Choban hisoblanadi.

Manar Development bosh direktori Davron Fayzimatovning maʼlum qilishicha, loyihani amalga oshirish uchun $100 mln dan ortiq sarmoya kiritiladi.

Unga koʻra, mazkur loyihani amalga oshirish uchun investitsiyalar bank kreditlarini jalb qilmasdan, Manar Development'ning oʻz mablagʻlari hisobidan amalga oshiriladi.

Loyiha taxminan 3,5 yil davomida amalga oshiriladi. Dastlabki obʼektlar 2028 yilda foydalanishga topshirilishi, qurilish ishlari esa 2029 yil oxirigacha toʻliq yakunlanishi kutilmoqda.

#Chorsu mehmonxonasi

Sobiq Chorsu mehmonxonasi oʻrnidagi majmuaning qurilishi yil oxirigacha boshlanadi