Qayd etilishicha, Sirdaryo tumani “Sholikor" SIYu (suv isteʼmolchilari uyushmasi) hududida Sirdaryo daryosining ushbu hududdan oqib oʻtuvchi qismida fuqarolar B.X. va N.A. tomonidan taqiqlangan ov quroli, yaʼni elektr qarmoq yordamida baliq ovlanganligi aniqlandi.

Huquqbuzarlar turli xildagi jami 79 dona baliq hamda ov qurollarini oʻzlarining boshqaruvida boʻlgan transport vositasiga ortib, Toshkent viloyati Chinoz tumanida joylashgan “Chinoz baliq bozori”da sotmoqchi boʻlishganida davlat inspektorlari tomonidan toʻxtatib qolindi.

Holat yuzasidan huquqbuzarlardan belgilangan tartibda tushuntirish xatlari olinib, tegishli tartibda dalolatnoma rasmiylashtirildi. Noqonuniy ovlangan baliqlar va ov qurollari holatga huquqiy baho berilgunga qadar, vaqtinchalik saqlash uchun olib qoʻyildi. Shuningdek, huquqbuzarlikda foydalanilgan transport vositasi Oʻzbekiston Respublikasi MJtKning 291-moddasi “v” bandiga asosan, belgilangan tartibda vaqtinchalik saqlash uchun jarima maydoniga joylashtirildi.

“Noqonuniy baliq ovlash natijasida “Hayvonot dunyosini muhofaza qilish va undan foydalanish toʻgʻrisida”gi Qonunning 34, 35-moddalari talablari buzilgan. Hayvonot dunyosiga yetkazilgan zarar miqdori, Oʻzbekiston Respublikasi Vazirlar Mahkamasining 2025 yil 9 fevraldagi 80-son qaroriga asosan, 973 million 125 ming soʻmni tashkil etdi”, — deyiladi vazirlik xabarida.

Hujjatlar holatga huquqiy baho berish uchun prokuratura organlariga yuborildi.

#Elektr toki

Elektr toki bilan baliq ovlagan shaxslarga chora koʻrildi