Aytilishicha, bu yutuq Markaziy Osiyo mamlakatlari orasida ilk bor muhandislik sohasidagi Ginnes rekord hisoblanadi.

“Yangi Oʻzbekiston” bogʻida tashkil etilgan ushbu tadbirda 2 ming nafar yosh muhandis bir vaqtning oʻzida 25 daqiqada 1 ming 946 ta mini-robotni yasab, harakatga keltirdi.

Aytish kerakki, Ginnes rekordlar kitobida robototexnika sohasida 351 ta turli yoʻnalishdagi rekordlar mavjud. 2023 yilda Hindistonda 1 ming 459 nafar yoshlar bir vaqtning oʻzida mini-robot yasab, harakatlantirgan edi. Oʻzbekiston yoshlari bu galgi koʻrsatkich bilan dunyodagi eng yirik muhandislik missiyasiga erishdi.

Ushbu missiya yosh muhandislar uchun Ginnes rekordini qoʻlga kiritish imkoniyatini berishi bilan birga, ulkan tajriba, amaliy bilim va jamoaviy ish koʻnikmalarini ham taqdim etdi.

2 ming nafar yosh oʻz ishtiroki bilan butun respublika yoshlarining birdamligini namoyon etdilar. Misol uchun, missiyani amalga oshirishdan oldin barcha 2 ming nafar ishtirokchi bir vaqtning oʻzida davlat madhiyasini jonli xor tarzida ijro etgan. Bu lahza yoshlar qalbida milliy faxr va yurtga sadoqat tuygʻusini yanada kuchaytirdi.

Bu Ginnes rekordining yaratilishi, ayni paytda, Mustaqillik bayrami arafasida yosh muhandislar tomonidan yurtimizga berilgan toʻyona boʻldi. Mustaqillik bayramimiz ostonasida qoʻlga kiritilgan bu gʻalaba xalqimiz uchun ramziy maʼnoga ega boʻlib, yosh avlodning yurt ravnaqiga qoʻshgan munosib hissasi sifatida tarixda qoladi.

Tadbir Oliy taʼlim, fan va innovatsiyalar vazirligi tashabbusi bilan tashkil etildi.Tadbirning eng ahamiyatli jihatlaridan biri shundaki, imkoniyati cheklangan yoshlarimiz ham oʻz iqtidor va salohiyatini namoyish etib, aslida imkoniyatlari cheklanmaganini isbotladilar.

25 daqiqa ichida yosh muhandislarimiz tomonidan yaratilgan robotlar maxsus tartibda tekshirildi va tadbir bosh hakami tomonidan rasman tasdiqlandi. Shundan soʻng, Ginnes rekordi yangilangani toʻgʻrisidagi sertifikat tantanali ravishda oliy taʼlim, fan va innovatsiyalar vaziri Qoʻngʻirotboy Sharipovga topshirildi. Shu tariqa, Oʻzbekiston tarixida ilk bor muhandislik sohasida Ginnes rekordi oʻrnatildi.

#Ginnes

Oʻzbekiston yana rekordlar kitobiga kirdi