Uzluksiz toʻqson kun va undan ortiq vaqt chet elda boʻlgan qaytgan 18 yoshdan 60 yoshgacha boʻlgan Oʻzbekiston fuqarolari majburiy ravishda OIVga tibbiy tekshiruvdan oʻtkaziladi.

Oʻzbekiston Oliy Majlisi Senatining toʻqqizinchi yalpi majlisida “Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi qonun muhokama qilindi. Bu haqda yuqori palata matbuot xizmati xabar berdi.

Qayd etilishicha, soʻnggi yillarda Oʻzbekistonda mehnat migratsiyasi koʻlami va xorijdan qaytayotgan fuqarolar, shuningdek, tijorat va mehnat maqsadlarida kelayotgan chet elliklar soni ortib bormoqda.

2024 yilda qaytib kelgan 1,7 million fuqarodan atigi 434 ming nafari OIV/OITSga test topshirgan. Ularning 1 512 nafarida bunday kasallik aniqlangan. Tekshiruvdan oʻtkazilgan 12,7 mingdan ortiq chet el fuqarolari va fuqaroligi boʻlmagan shaxslar orasida 81 kishida bunday kasalliklar aniqlangan.

Taʼkidlanishicha, tekshiruvdan oʻtmagan migrantlarning qanchasida yuqumli kasalliklar borligi nomaʼlum. Shu jihatdan ushbu qonun dolzarb ahamiyat kasb etadi.

Qonun bilan “Odamning immunitet tanqisligi virusi keltirib chiqaradigan kasallik (OIV infeksiyasi) tarqalishiga qarshi kurashish toʻgʻrisida”gi, “Xususiy bandlik agentliklari toʻgʻrisida”gi va “Aholi bandligi toʻgʻrisida”gi Oʻzbekiston Respublikasining qonunlariga bir qator oʻzgartirish va qoʻshimchalar kiritilmoqda.

Jumladan, uzluksiz toʻqson kun va undan ortiq vaqt chet elda boʻlgan qaytgan 18 yoshdan 60 yoshgacha boʻlgan Oʻzbekiston fuqarolari, shuningdek, mehnat faoliyatini amalga oshirish maqsadida Oʻzbekistonga kelgan yoki respublikada doimiy yashayotgan chet el fuqarolari va fuqaroligi boʻlmagan shaxslarni majburiy ravishda OIVga tibbiy tekshiruvdan oʻtkazish belgilangan.

Oʻzbekiston fuqarolari va Oʻzbekistonda doimiy yashaydigan fuqaroligi boʻlmagan shaxslar majburiy tibbiy tekshiruvdan davlat byudjeti mablagʻlari hisobidan oʻtkaziladi. Xorijlik va fuqaroligi boʻlmagan shaxslar mablagʻlari, ish beruvchining yoki qonunchilikda taqiqlanmagan boshqa mablagʻlar hisobidan oʻtkaziladi. OIV/OITS va sil kasalligi aniqlanishi Oʻzbekiston hududida mehnat faoliyati huquqiga doir tasdiqnoma berishni rad etish uchun asos boʻladi.

Muhokama yakunida senatorlar qonunni maʼqullandi.

#OITS

Xorijdan qaytgan fuqarolarning OIVga test topshirishi majburiy boʻladi