Kecha, 24 iyun kuni Migratsiya agentligi rahbari Behzod Musayev va Shvetsiya Migratsiya vaziri Johan Forsell oʻrtasida Oʻzbekiston va Shvetsiya migratsiya sohasidagi hamkorlikni mustahkamlashga bagʻishlangan uchrashuv boʻlib oʻtdi.

Uchrashuvda noqonuniy migratsiyani oldini olish, inson huquqlarini himoyalovchi, qulay, shaffof tashkillashtirilgan migratsiya mexanizmlarini yaratish masalasi muhokama qilindi.

Maʼlum boʻlishicha, Shvetsiyadagi demografik jarayonlar tufayli transport, qurilish, sanoat, tibbiyot, taʼlim va xizmat koʻrsatish sohalarida kadrlar yetishmovchiligi kuzatilyapti. Oʻzbekiston ushbu mamlakat mehnat bozoriga malakali mutaxassislarni tayyorlash va olib kirish uchun yetarli salohiyatga ega.

Foto: Migratsiya agentligi

Shuningdek, uchrashuv doirasida migratsiya va mehnat migratsiyasi sohasida hamkorlik haqida qoʻshma deklaratsiya imzolandi, bu hamkorlik nolegal migratsiyaga chek qoʻyish, axborot almashish va konsullik qoʻllab-quvvatlash mexanizmlarini mustahkamlashga xizmat qiladi.

"Ishonchim komilki bugun imzolangan tarixiy hujjat, Oʻzbekiston – Shvetsiya munosabatlarini yangi bosqichga koʻtarish, va kelajakdagi faol hamkorligimiz uchun muhim qadam boʻldi. Mamlakatingizga ilk bor kelgan boʻlsam-da, jadal rivojlanayotgan iqtisodiyot, qolaversa barcha sohalardagi ijobiy imkoniyatlar menda juda ijobiy hissiyotlar qoldirdi", — dedi Shvetsiya Migratsiya vaziri Johan Forssell.

#Shvetsiya

Shvetsiya Oʻzbekistondan ishchilarni qabul qilishini rejalashtirmoqda