Yevropa Ittifoqi Rossiyaga qarshi 19-sanksiyalar paketini tayyorlayotganini eʼlon qildi. Yangi paketda Rossiyadan suyultirilgan tabiiy gaz (SPG) import qilishni taqiqlash, banklar va kriptovalyuta operatsiyalariga cheklovlar, shuningdek, neft tashuvchi «soya floti»ga qarshi choralar nazarda tutilgan.

Yevropa komissiyasi raisi Ursula fon der Lyayen jurnalistlar bilan uchrashuvda yangi chora-tadbirlarning asosiy yoʻnalishlarini taqdim etdi.

Rossiya SPGiga taqiq

Fon der Lyayenning taʼkidlashicha, Rossiyaning harbiy iqtisodi asosan foisil yoqilgʻidan tushadigan daromadga suyanadi.

«Biz bu daromadlarni qisqartirishni istaymiz. Shu sababli, Yevropa bozoriga Rossiya SPGini olib kirish taqiqlanadi. Vaqti keldi — kran yopiladi. Biz bu qarorga tayyormiz», — dedi u.

Shu bilan birga, Rossiya nefti uchun chegara narxi 47,6 dollarga tushiriladi. «Soya floti»ga mansub yana 118 ta kema sanksiya roʻyxatiga kiritiladi. Umumiy hisobda sanksiyalar ostidagi kema soni 560 tadan oshib ketadi.

«Rosneft» va «Gazpromneft» kabi yirik energetika kompaniyalari bilan savdo toʻliq taqiqlanadi. Boshqa kompaniyalarning aktivlari ham muzlatib qoʻyiladi.

Banklar va kriptovalyuta operatsiyalariga cheklov

Fon der Lyayenning aytishicha, Rossiya sanksiyalarni aylanib oʻtish uchun moliyaviy yoʻllardan foydalanmoqda.

«Biz Rossiya banklariga, shuningdek, sanksiyalarni buzishga yordam bergan uchinchi davlat banklariga operatsiyalar taqiqlaymiz. Shu bilan birga, kriptovalyuta platformalari ham ilk bor cheklovlarga duch keladi», — dedi u.

Yangi choralar orasida:

kriptovalyuta operatsiyalarini taqiqlash;

Rossiyaning alternativ toʻlov tizimlari bilan bogʻliq xorijiy banklarni sanksiya roʻyxatiga kiritish;

maxsus iqtisodiy zonalardagi kompaniyalar bilan bitimlarni cheklash bor.

Eksport nazorati kuchaytiriladi

Yevropa komissiyasi harbiy maqsadli tovar va texnologiyalar eksportiga cheklovlarni kengaytirmoqda.

Yangi roʻyxatga Rossiya va uchinchi davlatlardagi, Rossiya harbiy-sanoat majmuini qoʻllab-quvvatlovchi yana 45 ta kompaniya qoʻshildi.

Fon der Lyayenning taʼkidlashicha, joriy sanksiyalar allaqachon Rossiya iqtisodiyotiga katta zarba bergan.

Ukrainaga moliyaviy yordam

Yevropa Ittifoqi Ukraina mudofaa sohasini moliyalashtirish uchun yangi mexanizm ishlab chiqmoqda.

«Biz muzlatilgan Rossiya aktivlaridan olingan daromadlarni Ukraina himoyasi uchun yoʻnaltirish imkonini beruvchi qaror ustida ishlayapmiz», — dedi fon der Lyayen.

Sanksiyalar qachon kuchga kiradi?

Yangi paket faqat 27 ta YeI davlati bir ovozdan maʼqullagandan keyin amalga kiritiladi.

Shu paytgacha YeI 18 ta sanksiyalar paketini qabul qilgan boʻlib, ular savdo, moliya, energetika, sanoat, texnologiya, transport, ikki xil maqsadli tovarlar, oltin, yoqut va qimmatbaho buyumlarni qamrab olgan.

Yevropa Ittifoqi sanksiyalari roʻyxatida hozirda 2,5 mingdan ortiq jismoniy va yuridik shaxs bor.

#YeI

YeI Rossiyaga qarshi yangi sanksiyalar paketini tayyorlamoqda