Bu haqda respublika Bosh davlat veterinariya inspektori qarori qabul qilindi.

Qarorga muvofiq, Hindistonning butun hududidan tirik hayvonlar va parrandalar importi, shuningdek, Gʻarbiy Bengaliya shtatidan barcha turdagi chorvachilik mahsulotlarini olib kirish taqiqlandi. Cheklovlar 29 yanvardan kuchga kirgan.

Himoya choralari Butunjahon hayvonlar sogʻligʻini saqlash tashkiloti (WOAH) maʼlumotlari hamda Hindistondagi murakkab epidemiologik vaziyat haqidagi rasmiy xabarlar asosida joriy etildi. Shu bilan birga, Gʻarbiy Bengaliya shtatidan veterinariya nazorati ostidagi tovarlarni xalqaro tranzit orqali tashishga ruxsat etilgan.

Viloyatlar va chegara punktlaridagi hududiy veterinariya inspektorlariga cheklovlar ijrosi ustidan qatʼiy nazorat oʻrnatish, shuningdek, tadbirkorlar oʻrtasida tushuntirish ishlarini olib borish vazifasi yuklatildi. Ayni paytda, veterinariya xizmati Hindistonning epizootik jihatdan xavfsiz hududlaridan mahsulot importini alohida tartibda koʻrib chiqish huquqini saqlab qoladi.

Maʼlumot uchun, Nipax virusi zoonoz infeksiya hisoblanib, hayvonlar va odamlarda ogʻir kasalliklarga sabab boʻlishi mumkin. Vaqtinchalik cheklov mazkur patogenning Oʻzbekiston hududiga kirib kelishi va tarqalishining oldini olishga qaratilgan.

Jahon sogʻliqni saqlash tashkiloti esa Nipah virusi hali toʻliq oʻrganilmagani sababli uning yanada tarqalish ehtimolini istisno etmayapti va hukumatlarni aholini xavf omillari haqida xabardor qilishni kuchaytirishga chaqirmoqda.

#chorva

Oʻzbekiston Hindistondan hayvonlar va chorvachilik mahsulotlari importini vaqtincha chekladi