Prezident administratsiyasi matbuot xizmatiga koʻra, qaror 2025 yil 3 iyunda Bishkek shahrining Pervomay tuman sudi chiqargan hukm ijrosini taʼminlash maqsadida qabul qilingan.

Farmon «Qirgʻiziston Respublikasining davlat mukofotlari, faxriy unvonlari va mukofot pullari toʻgʻrisida»gi qonunning 27-moddasi 1, 2 va 4-qismlari hamda Konstitutsiyaning 71-moddasiga muvofiq chiqarilgan.

Farmonga asosan, Almazbek Atambayev quyidagi davlat mukofotlaridan mahrum etildi:
— «Qirgʻiziston Respublikasi Qahramoni» oliy darajasi;
— II darajali «Manas» ordeni;
— «Danaker» ordeni;
— «Dank» medali.
Shuningdek, Atambayevni davlat mukofotlari bilan taqdirlash toʻgʻrisida 1999, 2007, 2011 va 2017 yillarda qabul qilingan prezident farmonlarining ayrim bandlari bekor qilindi.

Bosh prokuratura huzuridagi Sud ijrochilari xizmatiga koʻrsatilgan davlat mukofotlari va ularga tegishli hujjatlarni belgilangan tartibda olib qoʻyib, keyinchalik davlat mukofotlari fondiga topshirish vazifasi yuklatildi. Farmon imzolangan kundan eʼtiboran kuchga kiradi.

Maʼlumot uchun, Qirgʻiziston kuch tuzilmalari Almazbek Atambayevni 2019 yil 8 avgustda Bishkekdan 20 kilometr uzoqlikda joylashgan Qoʻy-Tosh qishlogʻidagi qarorgohida qoʻlga olgan. 2025 yil iyun oyida sud uni sirtdan 11 yil 6 oyga ozodlikdan mahrum qilgan.

#davlat mukofoti

Atambayev davlat mukofotlaridan mahrum qilindi